Mizoram State Project Monitoring Committee in Lawngtlai leh Hnahthial-a hnathawh mek an enfiah

Mizoram State Project Monitoring Commitee (MSPMC) chuan nimin khan Lawngtlai-a Solid Wasteangement Centre chu a hmunah kalin hnathawh mek an enfiah a, Khum 50 awmna tur District Hospital Hnahthial sak mek pawh an enfiah bawk.

Mizoram State Project Monitoring Commitee (MSPMC) Team te hian Er. Sanghrima Chongthu hovin Lawngtlai-a Solid Wasteangement Centre sak mek hi tlawhin Wet Waste Composting Centre, Dry Waste Composting Centre, Site Office cum Staff quarters, Sanitary Landfill leh a dangte a hnathawh mek chu endikin thawktute nen an hnathawh chungchang an sawiho a. Hmanrua hmante a that tawk leh tawk lohte khawl hmangin an endik bawk a. Mizoram sawrkar hnenah report an thehlut leh dawn a ni.

Solid Waste Management Centre, Lawngtlai hi Urban Development & Poverty Alleviation (UD&PA) hnuaia sak niin Rs. 6,97,70,000 senga sak tur a ni a. Kum 2024 October thla khan hna thawh tan niin kum hnih chhunga zawhfel tura ruahman a ni a. Solid Waste Management System-ah hian Wet Waste Composting Centre, Dry Waste Composting Centre, Site Office cum Staff quarters, Sanitary Landfill leh a dangte a awm dawn a. KMMTP kawngpui Phaikhangmual a awm niin, a sak hna thawktu hi Lalfamkima, Aizawl a ni.

Nimin vek khan Mizoram State Project Monitoring Committee (MSPMC) te hian Er. Sanghrima Chawngthu kaihhruaina hnuaiah khum 50 awm theihna tur District Hospital Hnahthial sak hna thawh mek chu enfiah bawkin PWD Building Division Senior EE, Er. Zodingliana; Medical Superitendent, Dr. Zosangliani leh Contractor ten an lo dawngsawng a. District Hospital Hnahthial leh Staff Quarters sak mek te hi North Eastern Consultancy Services (NECS) ten cheng vbc. 16 chuang sengin an sa mek a ni.

Hospital building leh Staff Quarters sak an enfiah hnu hian CMO Office Conference Hall-ah inkhawm hona neih zui niin MSPMC Team Leader Er. Sanghrima Chawngthu chuan thil tha zawk a chhuah theihna atana Project te hi endik an nih thu a sawi a. Hnahthial District Hospital sak mek dinhmun pawh a hmunah an rawn hmuh tawh thu leh Hospital thawktuten siamrem tul an tih te, Contractor te harsatna neih bakah chak zawka hna thawh a nih theih dan tur te chu Committee-ah report thehluh a nih tur thu a sawi a. Committee chuan mamawhte chu chak taka an bawhzui zel tur thu sawiin, hetiang hunah hian an hmalakna hmachhawpte chu tualchhunga Stake holder, NGOs leh khawtlang hruaitute hrilhhriat ve thin nise tha a tih thu a sawi bawk.