Drug License 4 suspend tawhin 11 tihtawp sak an ni

Kumin sawrkar kum kal mekah damdawi ruihtheih kaihhnawih ah Drugs License pali (4) suspend a ni tawh a, Drugs License tihtawpsak (cancel) 11 an awm tawh bawk.

Health Department hnuaia Food & Drug Administration (FDA) thawktute sawi danin damdawi zuar zingah Dan bawhchhiaa damdawi hmansual theih zuar manchhuah an awm zauh zauh reng a, an bawhchhiat dan azirin an License suspend emaw, cancel emaw a ni thin a. Tun sawrkar kum kal mekah hian damdawi ruihtheih kaihhnawihah License pali suspend a ni a, an zinga pathum chu Aizawl-a awm an ni a, pakhat chu Aizawl pawn a ni. Hei bakah hian License 11 cancel a ni a, chung zinga pariat chu Aizawl-a awm niin pathum chu Aizawl pawna awm an ni a, Damdawi zuar ten dan pela damdawi an hralh thin tlanglawnte hi khuh damdawi, Alprazolam, Diazepam, Tramadol, Dicyclomine te an ni a. FDA hian License leh registration chi hrang hrang pechhuakin a enkawl zui a, chungte atang chuan tun kum kal meka revenue cheng nuai 37 an hmu tling tawh a ni.

Thudawn danin License suspend emaw, cancel emaw hi thil namai a ni lova, cheng nuai tam tak senga kum tam lo kalpui tawh an ni tlangpui a. Dan bawhchhiate hremna hi License cancel emaw, suspend emaw a ni ngawt lova, Drugs Rules, 1945 chuan Court case siama penalty a pek ang tantir leh pawisa chawitir tura hmalak chu an tih dan tlangpui niin an sawi a. Loh theih loh atan prosecution hi dah ni thinin kumin ah prosecution siam a ni lo niin an sawi.

FDA thawktute chuan damdawi leh ei/in quality enkawl hi an dinchhan leh a hnapui ber pakhat a ni tih sawin, Damdawi & Food quality tha lo hi thihna hial thlen thei a ni a, a dapchhuah hna an thawk reng thin a. Damdawi sample-te chu Regional Drugs Testing Laboratory, Guwahati (Central)-ah leh Private Laboratory dangah thawn rih a ni a. Tun financial year chhung hian sample 506 thawn a ni tawh a, result dawn chinah sample 15 quality tha lo an awm a. Food Testing Laboratory (FTL) hi Zemabawk-ah kalpui mek a ni a. Aizawl leh Lunglei-ah Food Safety on Wheels (Mobile Testing Laboratory) pakhat ve ve dah a ni a, hei hian test a ni bawk. Tun Financial Year chhung hian Food sample 730 test a ni.

Thawktute chuan damdawi ruih theih hmansual ven hna an thawk bawk a. Damdawi pawimawh zingah ruih nana hman theih engemaw zat chu Drugs Rules, 1945 chuan Schedule X (Drugs with high potential for abuse and dependence) leh Schedule H-1 (Habit forming drugs)-ah a dah a. Mizorama hmuh theih lar zual damdawi 15 thlangchhuakin fimkhur taka kawl leh hralh a nih theih nan wholesaler leh retailer-in an kawl theih zat bithliahna siam a ni a, a zuarte an fimkhur phah hle tih an sawi.