Mizoram State Advisory Committee thutkhawm neiin Vawiin-ah Public Hearing neih a ni dawn

Mizoram Electricity Regulatory Commission (MZERC) huaihawtin nimin khan Mizoram State Advisory Committee Meeting vawi 28-na chu Aijal Club-ah neih a ni.

Mizoram State Advisory Committee Meeting hi MZERC Chairperson Er. Benjamin L. Tlumtea chuan kaihruaiin Mizoram a Power Supply tha zawk neih dan tur te, P&E Department-in mipuite hnena Eng tha tak a pek theih dan tur te, Consumer-te hmakhaw ngai taka Power Supply chungchanga lungawi lohna rang zawka chinfel sak an nih theih dan tur te, AMC area leh AMC area pawn lama fel fai zawka Street Light enkawl dan tur leh Smart Metering hna thawh mek chungchangte ngaihtuah a ni a. Kum 2026 – 2027 atana P&E Department-in Power Supply enkawl nana sum a mamawhte, sawrkar Subsidy leh Eng chhit man (tariff) hmanga hmuhlet leh dan turte sawiho ni bawkin, Vawiin, March ni 20 hian P&E Department-in Electricity Tariff hman an dilna chungchang hi ngaihthlakna, Public Hearing neih leh tur a ni a, Commission-in mipui atanga rawtna leh sawiselna a dawnte leh P&E Department chhannate ngaihthlak a ni ang.

Nimin-a thutkhawm ah hian MZERC hmasawnna tarlangin Chairman Er. Benjamin L. Tlumtea chuan Power Foundation of India-in nikum 2025-a States leh Union Territories-te chet that dan, Performance Rating a peknaah point 87 hmuin Mizoram Electricity Regulatory Commission (MZERC) chuan India ram pumah 10-na a hauh phak thu a sawi a, Grade A hmu phak State tlemte (State 11) zinga Mizoram a tel ve thei chu lawmawm a tih thu a sawi bawk.

State Advisory Committee hi Section 87, Electricity Act, 2003-in a sawi anga State Electricity Regulatory Commission thurawn petu tur atana din niin heng - Commerce, Industry, Transport, Agriculture, Labour, Consumers, Non-Governmental Organizations leh Electric lam kaihhnawiha academic and Research bodies hrang hrang atanga mi thiamte member atan ruat thin an ni.