Livestock insurance chungchang inhrilhhriatna neih a ni

Nimin khan Siaha-ah Livestock Insurance khuhhawnna neih niin Siaha District chhung khaw hrang hranga ranvulhtu mimal leh Society hruaitu kalkhawmte chu Livestock Insurance chungchang hrilhhriatna neih nghal a ni.

He hun hmanpuitu Siaha DVO Dr. H. Lalzarliana chuan Mizoram in bung thar a kaina tur hun pawimawh tak hmang tura kalkhawmte chu lawmthu hrilhin, rante hi mi kut tawrh vangte, khuarel chhiatna leh hri avangin an thi fo a, chutianga chhiatna tawh palh hlauh anih pawha kut benga kan awm loh nan leh engemaw zat zangnadawmna an hmuh theih nan sawrkarin ruahmanna tha tak a siam chu ranvulhtu a tam thei ang berin chhawr se a duh thu a sawi a, nikum-a vawk hri (ASF) lêng vang khan Siaha District chhungah vawk nuai 800 man chuang thi leh suat anih thu a sawi bawk.

He hunah hian National Insurance Company Limited aiawhin HZ. Lalremtluanga chuan Livestock Insurance inkaihhruaina leh kalpui dan tur a sawi zau a, Insurance kan tih reng rengin zaa za (100%) hmuh let theih a ni lova, hri lenna hmuna sawrkarin a puan meka chengte tan insurance a tih theih loh bawk a; chutih rualin Mizo mipuite hmakhua ngaia Mizoram sawrkar leh National Insurance Company Limited-in thawh-hona thuthlung a ziak chu thil lawmawm tak a nih thu leh a tam thei ang berin chhawr se a duh thu a sawi bawk.

He hunah hian Insurance ti turte tana hriat tur pawimawh hrang hrang tarlan niin, natna avang emaw, accident avanga ran a thi anih chuan darkar 24 chhungin emaw, Office kal ni (working day) hmasa berah Insurance Office hriattir tur a nih thu tarlan a ni a. Insurance hian Natna avang emaw, accident avanga ran thi (Death) tan zangnadawmna a hmuh theih thu leh Insurance in a huam loh hrang hrang te tarlan a ni a. Serchhip District an Lalmalsawmi (Ph. No. 9147400511)-ah document thehluh theih a ni ang.