Mizoram-a sawrkar Pisa 5-ah e-Office kalpui ni tawhin Office dang 23-ah kalpui leh tum a ni

Mizoram sawrkar-a Department of Personnel & Administrative Reforms (DP&AR) changtu Minister K. Sapdanga chuan tun dinhmunah Office panga (5)-ah e-Office kalpui a ni tawh tih sawiin, langtlang Sawrkar siamna atan a tangkai hle niin a sawi.

Mizoram Legislative Assembly Session neih mekah ziaka zawhna chhangin DP&AR changtu Minister K. Sapdanga chuan e-office chu Paper hmang lovin File leh document-te kaltir a nih avangin Paper man-a insen teuh teuh a ngaih loh bakah, a felfai a, file chhui zung zung a tih awlsam bakah Document-te awlsam taka zawnchhuah mai a ti awlsam tih a sawi a. Hei bakah hian e-Office chhungah him taka document-te dah that an nih avangin kangmei leh chhiatna dang lakah pawh a him hle tih sawiin, e-Office chhungah file kal dante a langchiangin, lang tlang Sawrkar siamna lamah a tangkai hle tih a sawi a. Hna thawhna ah file kal kualtir zung zung a awlsam avangin a tangkai hle tih a sawi a, e-Office atang hian file zawnchhuah, a hmanhmawh thlak dan azira kal kualtir, awlsam taka a kawltu leh a kalna chin zawnchhuahte a awlsam a, hna thawh a ti awlsamin, hlawk zawkin hna a thawh theih phah tih sawiin. e-Office-a file-te chu Officer Credentials neite chauhin an en theih avangin a him bawk tih a tarlang a ni.

DP&AR Minister K. Sapdanga chuan tun dinhmuna e-office kalpuina Office 5 (panga) a awm thu sawiin, heng bakah hian Office 23-ah kalpui leh tum a nih thu a sawi a. Heng zingah hian Aizawl, Champhai, Khawzawl, Kolasib, Lawngtlai District leh Saitual District-a DC office theuh te, Directorate zingah Commerce & Industries, Science & Technology, LAD, Rural Development, Tourism leh UD&PA, AMC leh LMC, ATI, Registrar of Cooperative Societies, CE, I&WR Department, CEO MzSLRM, E-in-C, P&E Department, Protocol & Hospitality Wing (GAD), SIRD&PR leh Social Audit Unit (MISSAT) te a tel thu te pawh ZPM Member, VL. Zaithanzama zawhna ziaka a chhanna ah a tarlang bawk a ni.