Mizo hmeichhia te dinhmun tha zawk leh zahawm zawkah hlankai an nih thu Chief Minister in a sawi

International Women’s Day 2026 lawmna chu nimin khan Chief Minister Lalduhoma hova hman niin Chief Minister chuan The Mizo Marriage & Inheritance of Property (Amendment) Bill, 2026 hmangin Mizo hmeichhia te chu dinhmun tha zawk leh zahawm zawkah hlankai an nih thu a sawi.

Dawrpui Multipurpose Centre-a International Women’s Day 2026 lawmna hunah hian Chief Minister Lalduhoma chuan he huna kalkhawm te chu Women’s Day chibai bukin, Mizote chu hmakhawsang atanga hmeichhiate dinhmun dah hniam ve lo tia sawi theih kan nih thu leh an chan chhiatna lai ber nia lang thin, ‘Mak chhiat’ an tawh chang emaw, ‘Sumchhuah’ emaw-ah te dinhmun chhe taka an awm thin chu, sawrkarin The Mizo Marriage & Inheritance of Property (Amendment) Bill, 2026 a pawm tak hmangin dinhmun tha zawk leh zahawm zawkah a hlangkai tih a sawi a. “Sawrkar lai mek chuan hmeichhe MLA pathum lai a neih bakah Mizoram-a Cabinet Minister-a Hmeichhia dah hmasa ber sawrkar a ni a, a thatzia chu hnam dangte pawhin hmuhpuiin, ‘Women Icon Award’ an pe hial a ni,” a ti.

Chief Minister chuan mipa leh hmeichhe tih tlan theih leh nih tlan theih china tehin Mizoram chu India rama hmeichhiate dinhmun that berna State zinga mi a nih a rinawm tih sawiin, “He dinhmun kan thlen theih chhan chu thil tam tak karah kan hnamzia vang te, kan Sakhuana vang te leh MHIP leh hmeichhe pawl hrang hrangte hmalakna vang a ni,” a ti a. Mizo hmeichhiate chu eizawnna kawngah pawh sawrkar hna sang mai piah lamah sumdawnna lamah leh Entrepreneurship lamah te rilru puitling tak puin, a tlem emaw, a tam emaw, eng emaw tal lo thawkchhuak ve theia awm an tum hram hram thin tih a sawi a. Hmeichhiate hmasawnna ram a nih avangin khualzinte pawhin an rawn ngaihven thu a sawi a. Sawrkar kal laiin hmeichhiate a ngaihsakzia lanna pakhat chu an Flagship Scheme, Bana Kaih-ah a nih thu pawh sawiin, CM Special Package Pilot phase-ah mi 2255 zinga 985 chu hmeichhia an ni a; CM Special Package Phase II, tunhnai lawka sem chhuahah mi 458 zinga 211 te chu hmeichhia an ni a; Phase-II hnuaia dilna approved tawh, la sem chhuah si loh 397 awm mek zinga 196-te chu hmeichhia an nih thu leh Loan Component-ah pawh Pilot Phase-a loan sanction tawh 394 zinga mi 119 te chu hmeichhia an ni a, Phase II-a loan sanction tawh mi 10 zinga 4 hmeichhia an ni, a ti bawk.

He hunah hian Social Welfare, Women & Child Development Department changtu Minister Lalrinpuii chu Khual zahawm niin hmeichhia te’n chanvo an chan theih reng, duhsakna an chan loh avanga an chunga tla lo tam tak a awm laiin, Chief Minister chuan Cabinet Minister atan hmeichhia ruatin, hmalakna hrang hrangah kaihruaiin, mamawh a thlente a tihhlawhtlinsak thin tih sawiin, lawmthu a sawi a. WCD chu hmeichhe hotu hruaina tha hnuaiah thawhhona tha an neih avangin hmalakna chak takin an kalpui thei tih a sawi bawk.

Nimin-a he hun hman hi SW&WCD Commissioner & Secretary Lalzarmawii chuan kaihruaiin WCD Director Zoramthangi Chhangte chuan kumin IWD thupui hmangin thu a sawi a. Mizoram chhunga hmeichhiate dinhmun leh an harsatna tawh thinte a tarlang bawk a. Kawng hrang hranga Mizo hmeichhia hlawhtlinna changte hnenah lawmpuina hlan an ni bawk.

Hmeichhe hlawhtlingte chawimawina hunah hian Mizo Hmeichhia, All India Services-a thawk mi 11; Sports lam leh entawntlak khawpa hlawhtlingte (Exemplary Female Achievers) mi 6; STEM (Science, Technology, Engineering & Mathematics)-a titha mi 8; Gender Role Breakers (hmeichhe hna anga ngaih ngai loh thawkte) mi 8 leh Exceptional Women (Mizo hmeichhia mi bikte) mi 7 hnenah chawimawina hi hlan a ni.