Minister in Sub-Centre thar a hmunah a tlawh

Aizawl Tuikual North-a Health Clinic chu Health Sub-Centre a hlankai a nih hnuah Inrinni khan Health Minister Lalrinpuii chuan tlawhin Bialtu MLA Pu Lalnghinglova Hmar-in a tawiawm.

He hunah hian Health Minister Lalrinpuii chuan, Tuikual North chu Veng lian tak ni siin, hun rei tak chhunga an dil Health Sub-Centre an hmu mai thei lo tih a sawi a, an Bialtu MLA-in a vei em em a, an remchan hmasakah an pe ta tih sawiin, a sakna tur sum pawh an pe thuai dawn tih a sawi bawk. Health Minister chuan ZPM sawrkarin kum hnih hmel a hmu ve ta tih sawiin, an hmalakna te pawhin rah tha a chhuah tan tih a sawi bawk.

He hunah hian Bialtu MLA, Lalnghinglova Hmar pawhin a Bial te harsatna hriatpuia an dilna tihhlawhtlinsaktu Health Minister chungah lawmthu sawiin, Veng mipuite tana tangkai tak tur an neih belh chu lawmawm a tih thu a sawi bawk a ni.