Action la turin Minister ngen

Lunglei Zobawk North-a All NGO chuan an Veng mi Raicheh-a a thihna chungchang ah action la turin Health Minister chu an ngen.

Nimin a thuchhuah an siamah All NGO Zobawk North chuan tun thla ni 12-a Civil Hospital, Lunglei-a an veng mi F. Lallawmkimi (31), PC. Lalrem-ruata nupui Raicheh-a a boral chungchangah Civil Hospital Lunglei-a thawktute'n khawlaia nau hring tawh F. Lallawmkimi an dawngsawng thei lo chu hriatthiam harsa an tih thu leh an lung a dam thei lo tih sawiin, Civil Hospital a thawktute an dem takzet tih an sawi a. He thil thleng a mawh-phurtute chungah Action na taka la turin Health Minister an ngen tih an sawi a ni.

All NGO Zobawk North chuan Raicheh a boral ta, F. Lallawmkimi’n a kalsan tak a fate enkawl nan zangnadawmna pek a nih theih nana hmalak sak turin Health Minister an ngen bawk a. Hetianga mirethei leh dinhmun harsa zawkte chunga harsatna thleng ang hi tun hnuah Lunglei Civil Hospital-ah thleng nawn tawh lo se an duh takzet tih an tarlang a. Tun thla ni 21 thleng an ngaihchan dawn thu leh hmalakna a awm lo a nih chuan nasa zawk a lungawilohna lantir an tum thu an sawi bawk.

Thudawnna pakhat in a tarlan danin F. Lallawmkimi hi March 12, 2026 khan a nau pai avanga Civil Hospital, Lunglei OPD-ah a inentir a, hemi hnu hian khawlaiah engengemaw lei tur zawngin an vak kual a, Police Thana bula thingpui dawr-ah chawlin inthiar tur chuan nau a sangchhuak a, a kalpuitu chu damdawi In-ah kalin Hospital a duty te chuan khum a ruah loh thu leh an admit theih loh thu an lo hrilh avangin tlai dar 3:30-ah John Williams Hospital thlenpui a ni a. Hetah hian enkawl lailawk ni mah se Gynae a lo awm loh avangin Civil Hospital-a Gynae chu an phone sak hnuah Civil Hospital hi panpui leh niin hemi zan dar 6:35 vel khan a boral zui ta a ni.