Lirthei khalhtute hamthatna tur tihhlawhtlin ngei tum

Chief Minister Lalduhoma’n Mizoram Motor Transport Workers Welfare Bill chu an sawrkar chhung ngeiin tihhlawhtlin hman an tum tih a sawi.

Assembly Budget Session neih mekah Chief Minister Lalduhoma chuan Mizoram Motor Transport Workers Welfare Bill chu a draft-in an nei tawh tih a sawi a. Labour, Employment, Skill Development & Entrepreneurship (LESDE) leh Transport Department Officer-ten an sawiho hmasa tih sawi bawkin, “February 17, 2026 khan Secreary hoin LESDE Officer-te nen an enho leh, Minister hoin an enho leh anga, chumi zawhah Law & Judicial-ah vet turin pek a ni ang, kan sawrkar chhung ngeiin tihhlawhtlin hman kan tum dawn,” a ti.

Sawrkar hmasa hun, February 25, 2022 khan Assembly Session-ah ZPM member Dr. Vanlalthlana put luh, Mizoram Private Transport Workers (Welfare) Bill, 2022 chu ngaihtuah niin hnawl a lo ni tawh a. Hemi tum hian Ruling MLA zinga sawituten pass rih loh an duh thu an sawi a, eptu MLA-ten pass an duh thu an sawi thung a. Sawiho hnuah Speaker-in voice vote hmangin a buk a, hnawl a ni.

Hemi tuma bill sawihonaah hian ZPM Legislature Party Leader Lalduhoma chuan, “Vawiin a kan sawi hi eizawnna atana hmang tak tak driver-te chungchang a ni a, hamthatna buatsaihsak ila, thlamuang zawkin an awm thei dawn a ni,” a ti a. Bill pu luttuin Mizoram tana remchang ber nia a hriat a chhawpchhuak tih sawiin, “Kan hmusit tur niin ka hre lo. Kan duhkhawp loh laite hi Rules-in a chingfel vek thei. Pass duhna hi nei ila, a harsa lo,” a ti a. An rorel lai chu driver tam takin an thlir tih sawiin, “An hamthatna tur Bill lak tlak loh kan han tite hi an tan a na khawp ang,” a ti a, pass a nih rih loh pawhin Select Committee ngaihtuah tur tala dah tura a duh thu a sawi a ni.