CM in ‘Thangram Cultural Meet 2026’ hmanpuiin Hnam ri kham theih a nih loh thu a sawi

Chief Minister Lalduhoma chuan nimin khan ‘Thangram Cultural Meet 2026’ chu hmanpuiin, “Ramri in min dai dan mah se hnam ri chu kham theih a ni lova, ram hranah te, State hranah te awm mahila unau kan nihna te, hnam khat kan nihna te hi uar takin kan lantir zel dawn nia,” a ti.

Thangram Cultural Meet vawi hnihna hi Ronpur (Assam)-ah hman niin thupui atan ‘Unau kan ni’ tih chu hman a ni a, he hun hmanpuitu Chief Minister Lalduhoma chuan “History kan en chuan Cachar phaia khawsa hmasate chu Biate leh Hrangkhol te an ni a. Thangram pawh hi AD 1490 velah Ranglong, Sakechep, Hrangkhol, Molsom, Chorei leh Kaipeng Hnam ten an lo luah tawh a. British an lo lian a, an inkarah indonate a lo awm a. Vawiin-a Thangram kan han tih bik Langkaih phai leh Singla phai mel 180 bial-a zau hi kum 1867 khan ramri kham fel tak neiin British leh kan pipute khan inremna an siam ta a ni,” a ti a. “Ramri in min dai dan mah se hnam ri chu kham theih a ni lova, ram hranah te, State hranah te awm mahila, unau kan nihna te, hnam khat kan nihna te hi uar takin kan lantir zel dawn nia,” a ti bawk.

Inpumkhatna lama hmalakna kawngah Thangram mipuite an thawhhlawk hle tih pawh Chief Minister chuan sawiin, “In unau, tanpui ngaite tana vehbur in khawn dan te, Press Release siama in unaute thlavang in rawn hauh thin dan te pawh kan lo hre ve zel a. In chungah Mizoram mipuite pawh kan lawm a ni. Kan hnam huikhawmtu lian leh tangkai YMA te, MZP te leh Kohhran te, kan tlawmngai pawl dangte kaltlangin nghet takin invuan tawn zel ang u,” a ti a. Zofate huikhawm a, a tul anga tanpui zel chu sawrkar duh dan leh kal dan a nih thu pawh sawiin, “Khawvel huapa kan inhuikhawmna tur Mizo Diaspora Cell chu CM Office-ah kan din tawh a. Hna pawh an thawk nasa a, mi tam tak an tanpui tawh a ni,” a ti a. “Chutiang rilru putu sawrkar chuan Thangram-a kan unaute pawh hi a ngaihthah ngai lovang che u. In tana dan hnuaia tih theih kan neih te chu kan ti zel dawn a. Fahrahin kan kalsan lo vang che u,” a ti.

Tunhnaiah kan thenawma Zofate delh chin ramah harsatna a thleng hlawm tih pawh Chief Minister chuan sawiin, “Heng, kan chunga harsatna lo thleng te hi Pathian remruatna anga lo thleng, kan thatna tura a rawn tirh a ni lovang tih kan sawi thei lo. Engkim ti thei kan Pathian in hna a thawh chuan theih loh reng reng hi a awm lo a ni. Chuvang chuan, a malsawmna kan dawn theih nan ‘A ram leh a felna’ zawng zel ang u,” a ti bawk.

Thangram Cultural Meet hi MZP Vice President Sanghmingthanga chuan kaihruaiin Thangram Indigenous Peoples Movement President K. Vana Chorei chuan Chief Minister in an ram a tlawh chu ropui a tih thu sawiin, “Hetiang taka ram hruaitu lianin min tlawh hi kan la hre ngai lo. Kan ram tana ni chhinchhiahtlak a tling. Tunah chuan kan chhehvela hnam dangte pawhin nu leh pa kan nei a ni tih min hmuhpui ta a ni,” a ti a. “Mizoram mipuite hian hetah in fate kan awm a ni tih hi min rawn hre reng rawh u,” a ti bawk.

Ani bakah hian MZP General Hqrs. President Dr. C. Lalremruata leh Adviser F. Lalnienga te pawhin thu sawiin, Hnam lam leh zai chi hrang hrang entirin hun an hmang a ni.

Thangram tih hi Khawthlang ram (Thlang ram) tihna a ni a. Mizo thlang tla hmasate luah ram niin tunah hian khaw 24 vel leh mihring singthum vel an awm mek a. Heng rama cheng zohnahthlak hnam parukte hian Thangram Indigenous Peoples Movement dinin kawng hrang hrangin hma an la mek a. Thangram-ah hian kum 300 chuang lo khawsa tawh an nih thu sawiin, Thangram luah hmasatu an nih avangin a ram leilung fa dik tak an nih thu leh Mizoram sawrkar enkawlna hnuaia awm an duh thu te an lo sawi tawh thin a ni.