Eight Schedule-a Mizo tawng dah tum chungchang ah pawl hrang hrangte ngaihdan a thuhmun lo

Mizo Zirlai Pawl (MZP) President Dr. C. Lalremruata chuan India Danpui 8th Schedule-a Mizo tawng dah tum chu Zohnahthlak Hnam peng hrang hrangte hmin kim theih hunah ni thei se a ti.

Akahsvani-in a kawmna ah he thu hi sawiin mi tam takin Mizo tawng 8th Schedule-a dah chu thil tha tak niin zirlai pawl tan tak phei chuan rampum huap hna exam hrang hranga Mizo tawng ngeia Exam theihna tur, zirlaite tana tha tur a ni lawm ni tia an zawh thin thu a sawi a. Anni pawhin chu chu tha an ti tho tih sawiin, hetihrual hian Mizo tih chu khawi lai nge, Mizo tihah Mizo hnuaia Hnam peng hrang hrang te an hmin kim em tih chu an ngaihpawimawh thu a sawi a. MZP hnuaiah Hnam pual zirlai pawl 8 lai in affiliate an awm thu sawiin, heng hnam hrang hrangte hi Mizo-ah an la hmin kim lo a nianga tih vangin tuna 8th Schedule-a Mizo tawng dah tumna chu hun kal leh hret se, Mizo-a hmin kim hun a awm an beisei tih a sawi a. Chutih hunah chuan MZP chu 8th Schedule-a Mizo tawng dah duh ber ber tu an ni dawn tih a sawi a. Hei hi an tanna a nih angin nikum November thlaa Mizo Language Development Board te nena an inkawmkhawmna ah pawh tha taka an sawiho thu a sawi a. Nghah hreta Zohnahthlak hnam peng hrang hrangte hmin kim theih hunah an duh thu hemi tumah pawh hian an sawi tih a sawi a ni.

Hetihlai hian Mizo Writers Association chuan Assembly Budget Session neih meka ‘Eighth Schedule to the Constitution of India-ah Mizo tawng hi telh tura hma lak ni rawh se’ tih pass a ni chu lawmawm an tih thu Inrinni khan thuchhuah siamin an tarlang a. Mizo Writers Association thuchhuah chuan an pawl chu Mizo ziak miten hma an sawn theihna tura pawl din a nih thu sawiin, an hmalakna zinga pawimawh tak Mizo ziak mite tana hmasawnna a awm theih nan India Danpui 8th Schedule-a Mizo tawng dah chu a pawimawh hle tih an sawi a. 8th Schedule-a Mizo tawng dah a nih chuan Mizo ziak mite tan hamthatna leh hmasawnna tur tam tak a awm thei dawn tih an sawi a ni.

Mizo Writers Association chuan Zohnahthlak hnam peng hrang hrangte tawng humhalh a, tihhmasawn a tulzia hriain theihtawp chhuahin hma a la zel dawn tih pawh sawiin, Chutih rualin, tuna hman mek 'Mizo tawng' chu Zofate inbiakpawh tawn theihna leh hman tlanglawn ber a nih avangin inpumkhatna atan a pawimawh tih an sawi a. Hma a sawn zel theihna tur leh a than zel theih nan hma an la mek zel tih sawiin, Mizo tawng chu Zohnahthlak chi peng hrang hrangte tawng infinkhawmin a siam a nih avangin Mizo tawngin hma a sawn rualin chi peng dang tawngte pawhin hma a sawn ve zel an beisei tlat thu an sawi a ni.