Lengpui ram hralh chungchang CBI-ah refer tawh

Chief Minister Lalduhoma’n Lengpui ram hralh chungchang chu Central Bureau of Investigation (CBI)-ah an refer fel tawh tih a sawi.

Assembly Budget Session neih mekah Zirtawpni kalta, February 27, 2026-a Private Member Resolution sawihonaah he thu hi sawiin Chief Minister Lalduhoma chuan, Lengpui ram hralh chungchang chu February 23, 2026 khan CBI-ah an refer tawh tih a sawi a, “A ram neituin a chan a awm a, a commission titu pa in a chan a awm a, an ccount-ah a lut a, a chhui theih reng a, chu an account atang chuan khawiah nge a chhuah leh tih an rawn chhui dawn a, a luhna account neitu tu chu bânah i ti ang aw,” tiin member hmaah a sawi a ni.

Chief minister chuan a sawrkar chu mahni flagship programme kum khat chhunga thawk tan awmchhun a nih thu sawi bawkin, ZPM sawrkar chu Mizoramin sawrkar a neih tawh zawng zawngah electric bill tipung lo awmchhun an nih thu a sawi bawk a. Sawrkar hnathawk hlawh a huna an pe theite chu lawmawm an tih thu leh Kohhran hote pawhin Pathian ram Ip a hun pangngaiah an hawng leh thei ta niin a sawi a. “Kum 2024 Krismas present-ah sawrkar hnathawkte DA 4%-in kan tihpunsak a, nikum Krismas dawnah 4% bawkin kan tipung leh a, tun April 1, 2026 atangin 2%-in kan tihpunsak leh dawn a ni. Sum harsa chung chungin sawrkar hnathawk min tawiawmtute hi kan tih theih ang ang tihsak ve kan duh,” a ti bawk.

Mizoram a awm hnua Health Care tha ber siam chhuaktu sawrkar an nih thu leh hei aia tha a la awm ngai reng reng loh thute Chief Minister chuan sawiin, Work Order tel miah loa hnathawh pakhat mah an sawrkar ah a awm ve tawh loh thu te, chutiang bawkin Advertisement awm lovin hna pakhat mah an lak ve tawh loh thu te a sawi bawk.