Lengpui leh Sihphir-a ram lak chungchang sawifiah

Sawrkarin Lengpui leh Sihphir khaw ramah Indian Air Force hman tur ram lakna atana hriattirna chhuah chu chanchinbu a tihchhuah a nih loh thu Land Revenue & Settlement Minister B. Lalchhanzova'n Assembly a hrilh.

Assembly Budget Session neih mekah INC Member C. Ngunlianchunga zawhna ziaka chhangin Revenue Minister chuan May 15, 2025 khan Preliminary Notification chhuahin ram lak tum a ni a, Final Declaration Notification chu July 22, 2025-ah chhuah a ni a. Chanchinbu-ah erawh Notification hi chhuah a ni lova, Aizawl DC Pisa Notice Board ah tarchhuah a ni, a ti a. Chanchinbu a chhuah a nih loh chhan sawifiahin, “Lengpui leh Sihphir-a mimal ram acres 115 Indian Air Force hman atana ram lak (acquired) hi LR&S hriattirna May ni 15, 2025 anga kalpui a ni a. He hriattirna hi the Right to Fair Compensation and Transparency in Land Acquisition, Rehabilitation and Resettlement Act, 2013 section 11, section 9 leh section 40-na ram la tura hmanhmawh thlak bik thil hnuaia chhuah a nih vang a ni,” a ti. 

Lengpui leh Sihphir a mimal ram lak tur hi section 40-Special Urgency Clause Notification anga hmalak a nih avangin, India leh a thenawm (Bangladesh/Myanmar) ram ramri venhimna atana pawimawh (Defense strategic matter) a ni a. India leh Pakistan buaina avanga Operation Sindoor ni 07.05.2025 a kalpui hunlai leh State huap a Mock drill te pawh neih hun lai a nih vangin a sensitive em em a, chu mai bakah ram neitute thlan fel tawh leh No Objection Certificate (NOC) lak vek tawh a nih avangin puanzar tul lo leh ni lo zawnga a darh palh hlauh vang liau liau a chanchinbu a puanzar a ni lo a ni, a ti a. The RTI Act, 2005 Section 8(1)(a) hnuaiah hian ram venhimna atana pawimawh (Defence strategic matter) documents te hi mipui hnena pe chhuak lo turin hriatthiamna a pe tih a sawi bawk.

The Right to Fair Compensation and Transparency in Land Acquisition, Rehabilitation and Resettlement Act, 2013 Section 40 anga za zela 80 zangnadawmna pek a nih hnua a la bang za zela 20 zangnadawmna pek a nih hmaa a hmunhma endik (site verification) tumna-ah pawh Indian Air Force lam hian ram neitute, pawl hrang hrang, Village Council leh lirthei khalhtute pawh verification awm tur chungchang hrilh hriat an duh lo a. Chumi rual chuan Lengpui Airport hralh tum anga mipui (public) lamah thu belhchian dawl lo a than nasat vang a ni, a ti bawk. 

Zawhna dang chhangin Pu B. Lalchhanzova chuan pawisa pek a nih dan chu July ni 25, 2025 khan Henry Lalremsanga Hlawnmual chu Rs, 117,90,26,341 pek a ni a. Hemi ni vek hian Rohmingliana hnenah Rs. 32,41,94,731 pek niin Rohmingliana hi August ni 26, 2025 khan Rs. 37,58,50,269 pek leh a ni a. Sihphir-a ram neitu 8-te chu May ni 13 leh August ni 26, 2025 khan Rs. 8,46,53,291 pek an nih thu a sawi bawk.