Ruihhlo veivak titawp turin sawrkar in theihtawp a chhuah thu Home Minister in a sawi

Kum kalta 2025 chhung khan Mizoram-ah ruihhlo chi hrang hrang tam tham tak man niin ruihhlo veivak titawp turin sawrkar chuan theihtawp chhuahin hma a la.

Nimin-a Assembly Inkhawm ah ZPM MLA pathum- VL. Zaithanzama, Lt. Col. Clement Lalhmingthanga leh Jeje Lalpekhlua te zawhna intawm chhangin Home Minister K. Sapdanga chuan kum 2025 Calendar Year chhungin ruihhlo chi hrang hrang man a nih thu leh Heroin kg. 79.208; Methamphetamine kg. 964.428; Crystal Meth kg. 38.801; Ganja kg. 64.267; Alprazolam kg. 4.74; Codeine kg. 273; Opium kg 4.51 leh Caffeine kg 3000 man a nih thu a tarlang a. “Ruihhlo man te hi ND&PS Dan in a phut angin District tina District Drugs Disposal Committee ten an enfiah hnuah an remtihna in District hrang hrangah tihral thin a ni a. La tihral loh te chu District tina designated Police Malkhana-ah dah that a ni a, heng dahthatte pawh hi District Drugs Disposal Committee in a enfiah a rem a tih veleh tihral leh a ni ang,” a ti.

Ruihhlo veivak titawp tur hian Sawrkar chuan theihtawp chhuahin hma a lak chhunzawm reng thu Home Minister chuan sawi bawkin, “September 1, 2025 atang khan khawchhak atanga Mizoram-a ruihhlo lo lut tur dangchat turin ruihhlo do beihpui thlak tan niin ramri hrul hmun engemaw zat ah Mizoram Police leh khawtlang tangrualin ruihhlo lo lut tur ven hna hi an thawk a. District tina District Magistrate te kaihhruaina in ruihhlo do beihpui hi thlak a ni bawk a. He hmalakna hian ruihhlo manna kawngah nasa taka a puih avangin duty hi March 31, 2026 thleng pawhsei leh a ni,” a ti.

Ruihhlo lo lut tur do beihpui, Operation Jericho kalpui-ah hian a tangkai ber chu ramri bul-a awm NGO te an nih thu leh Excise Department leh Police ten an puihbawm thu Home Minister chuan a sawi a, a tirah khaw 22-ah NGO te phungbawm ah sawmin a hmatawng-ah an tan thu leh khaw tinah Police pahnih dahin an tanpui thin thu a sawi a. Mizoram-a ruihhlo rawn luhna khan hrang hrang an ven chua sawt viau nia an hriat thu leh ruihhlo lo luhna khan a tlem thu bakah Police dah te pawh tih tlem a nih thu a sawi a. An hmalakna chu a hlawhtling viau nia an hriat thu sawiin, Champhai District atanga ruihhlo rawn lut chu a awm meuh tawh lo tih a sawi a, chhim lamah leh hmar lamah erawh a lo darh tan deuh nia an hriat thu leh ruihhlo rawn luhna khan te hi tlawh an tum leh thu a sawi bawk.

Kum 2025-2026 January chhungin Mizoram Police te chuan Restricted Tender hmangin hnathawh 3 (pathum) an neih thu pawh zawhna dang chhanga sawiin Home Minister chuan a sawi bawk.