Assembly Session-a huntiam bawhchhia leh mi thusawi tibuai te Microphone Off sak dawn

Mizoram Legislative Assembly Speaker Lalbiakzama chuan Assembly Session-ah huntiam bawhchhe nasa lutuk leh mi thusawi lai tihbuai tum rana lo tibuai thinte chu an Microphone off sak zel tawh tur a nih thu sawiin, “Member-te hian dikna chanvo kan neih rualin, mawhphurhna pawh kan nei ve,” a ti.

Nimin-a Mizoram Legislative Assembly thutkhawm ah Speaker Lalbiakzama chuan tunhnaiah Assembly House kalphungin a tha lo zawnga sawi a hlawk tak viau thu sawiin, “Social Media leh tlangkam ti ti-ah Speaker-in a control tha tawk lo a sawi dawn dawn awm hi a lungchhiat thlak ka ti hle. Tunhma zawngin he House inrelbawl dan hian fak a hlawhin a thang mawi hle,” tiin India ramah chuan Mizoram Assembly House kalphung chu a tha filawr anga sawi a nih thin thu a sawi a ni.

Assembly Speaker chuan House proceedings Television leh Social Media lama pekchhuah a nih hnuah vai ho tihdan kan entawn ta emaw tih mai turin thusawi tura hun pekte tihbuai tum hrim hrim duh vanga lo auhbuai te a awm thu sawiin, “Speaker address lova Member dang address mai te leh thildang mawi lo tak tak a thleng fo. Hengte hian Handbook for Members in a tarlante a kalh tlat,” a ti a. House Member-te chuan dikna chanvo an neih ngei thu sawiin Assembly Speaker chuan, “Dikna chanvo hian mawhphruhna a keng tel tih hriat tur. Dikna chanvo kan nei tih vanga mahni mawhphurhna theihnghilh thaka House-a sapatal a rem lo. House leh mipui zah lohna lian tak a ni,” a ti a, House-a awm dan tura a thu sawiin bengkhawn a hlawh loh hle thina a hriat thu a sawi bawk.

Speaker Lalbiakzama chuan Member-te rawn veka thusawi hun tur a bitukin bawhchhiat a hlawh nasat thin thu sawiin, “Warning leh Final Bell a rik hnuah member-te'n thusawi kal laklawh lai an nei theih avangin minute hnih chhung nghah a ni ang. Chumi hnuah chuan Microphone off a ni ang,” a ti a, member-te an chanvo a nih anga thusawina hun an pekah huntiam chhunga sawi zawh an mawhphurhna a nih thu a sawi bawk.

Hei bakah hian Assembly Speaker chuan member pakhatin phalna hmua thu a sawi laiin member dangte'n an tibuai fo thin tih sawiin, “Member thusawi lai Member dangin thusawi thei lek lova kan lo tihbuai thin hian House dan a kalh. Khatiang thil a thlen khan a tibuaituin a member pui dikna chanvo a bawhchhiat sak tihna a ni. Point pawimawh hriatfiah duh han zawh lawk hi chu awm lo pawh a ni lo,” a ti bawk.