Larsap-in National Level Camp-a tel NCC Cadet-te lawmpuina buatsaih

Zonuna Kawlni /

Mizoram atanga National Level Camp-a tel National Cadet Corps (NCC) Cadet 19 te lawmpuina hun chu nimin khan Lok Bhavan Durbar Hall-ah Mizoram Larsap chuan a buatsaih a, he hunah hian Chief Minister Lalduhawma leh Sports & Youth Services Minister Lalnghinglova Hmar bakah Lt. Col. Clement Lalhmingthanga MLA te pawh an tel a ni.

NCC Cadet-te lawmpuina hunah hian Larsap General (Dr) Vijay Kumar Singh chuan Mizoram NCC indin thar zelna kawngah hmasawnna thar a hmu chu phurawm a tih thu sawiin, NCC Group HQ Aizawl hawn thar a ni leh hemi hnuaia Mizoram NCC Unit zawng zawngte tha taka kalpui a ni chu lawmawm a tih thu a sawi a, hemi avang hian thalai tam zawkin NCC an zawm belh ngei a beisei thu a sawi a. India ram NCC Cadet sang chuang zingah fiahna hautak tak paltlanga National Level Camp-a tel thei Cadet 19 lai Mizoramin a nei chu chhuanawm a tih thu sawiin, hei hian Cadet-te taimakna, inthunun theihna leh tumruhna nasat zia a lantir a, fak pawh an phu hle a ni, a ti bawk.

He hunah hian Larsap chuan amah ngei pawhin kum 1965-ah NCC Advanced Leadership Camp hmasa ber a lo chhim tawh tih sawiin, Camp leh Kartavya Path vela chet tlatnate chu damchhunga an hriat reng dawn thu leh hruaitu tha ni tura a puih dawn thu a sawi a. NCC Group HQ Aizawl hnuaiah 3rd Wing ni turin Naval Wing din a duh thu sawiin, a hlawhtlin thuai theih nan Group Commander chu chak taka hma la turin a chah a. NCC Cadet-te hlawhtlinna phena mi tangkai nu leh pa, zirtirtu leh NCC Officer-te kaihhruaina leh fuihnate chu fakawm a tih thu sawiin, NCC Cadet-te chu duh tawk mai lova tun aia nasa zawka tan la turin a fuih a. Mahni inthununna, rinawmna, tlawmngaihnate chhawmnung chung zela ram tana theihtawp chhuah tum turin a fuih bawk.

Tunhnaia NCC National Level Camp neih zawh takah khan Mizoram atangin NCC Cadet 19 an tel a, heng te hi 20 Mizo Bn. NCC atangin Cadet 2, 1 Mizo Bn. NCC atangin Cadet 1, 1 Mizo Air Sqn NCC atangin Cadet 8 leh 2 Mizo Bn. NCC atangin Cadet 8 te an ni a. Heng zinga Cadet 4 te hi Republic Day Camp (RDC) ah telin, Cadet pakhat chu All India Thal Sainik Camp (AITSC) ah a tel a, Cadet 5 te All India Vayu Sainik Camp (AIVSC), Air Force NCC central Camp-ah telin, Cadet 9 te Special National Integration Camp (SNIC) ah an tel a ni.

Nimin-a he hun hman ah hian Larsap leh Chief Minister-te hian National Level Camp-a tel NCC Cadet-te hnenah chawimawina thilpek an hlan bakah an tawnhriatte zawtin an kawm bawk a. he hunah hian Brig GS Arora, Group Commander, NCC Mizoram, sawm bik Official dangte, NCC Officer-te leh Cadet tawiawmtu an chhungte an tel a ni.

Comments

Post a Comment

I ngaihdan i sawi hian mipui ngaihdan i tarlang a ni!

Popular News (Last 30 Days)

Kawng siam dawn hnai

Zonuna Kawlni /
Image
National Highway-02 siam a nih hnuah he kawngpui in Serchhip Town chhunga a paltlang tawh loh, Chhiahtlang leh Serchhip khawpui chhung kawngpui siamthat hna chu PWD Serchhip Division ten an thawk dawn hnai nia thudawn niin hemi atan hian sum pawh ruahman a ni tawh nia thudawn a ni a. Tun tumah hian khawpui chhung paltlangtu Kikawn leh Sailiamkawn inkar chu Bituminous concrete a siam tum niin kawng siam hi zawhfel a nih hnuah chuan thla ruk (6) chhung Road cutting phalna pekchhuah a ni dawn lo a ni. Tun tuma kawng siam hna thawh turah hian New Serchhip North VC huamchhunga kawng kual nasa lutuk chu paih turin ruahmanna siam a ni bawk nia thudawn a ni.
Kimchang zawkin »

SEDBA hruaitu an thlang

Zonuna Kawlni /
Image
Serchhip District Boxing Association chuan kum 2026-2028 chhunga an hruaitu thlanna neiin President-ah C. Biakchhawna (New Serchhip) Sr. Vice President-ah BC. Liantluanga (Tuikhuah Veng); Vice President-ah R. Vanlalpeka (Vengchung), Secretary-ah David Laldintluanga (New Serchhip) Joint Secretary-ah T. Lalhuthanga (New Serchhip) leh V. Zosangliana (Leisang Veng); Treasurer-ah Prem Lalhmangaiha (Chanmari Veng) leh Fin. Secretary-ah David Lalrinmawia (P&E Veng) te thlan an ni.
Kimchang zawkin »

DIET Serchhip ten an titha

Zonuna Kawlni /
Image
Mizoram Board of School Education (MBSE) chuan nikum (2025) December thlaa Diploma in Elementary Education (D.EI.Ed) Examination a buatsaih result chu niminpiah khan a tichhuak a. District Institute of Education and Training (DIET) Serchhip-a Training mek te pawh an tha thawkhat a ni. DIET Serchhip atang hian 1st Semester-ah zirlai 48 ten Exam beiin mi 39 an pass a, a za zela 81.25 pass ang niin zirlai 9 ten Subject bat an nei a. 3rd Semester-ah zirlai 49 ten exam beiin an vaiin an pass vek thung a ni.
Kimchang zawkin »