Rel hmangin Sairang-ah buhfai rawn phurh thlen niin Minister hovin lo hmuah a ni

Sairang Rel Station-ah a tum khatna atan Rel hmangin Buhfai phurh thlen a ni ta a, nimin zing khan FCS&CA Minister B. Lalchhanzova hovin an lo hmuak a ni.

Tun tumah hian Rel wagon 42 hmangin buhfai quintal 25,901 chu rawn phurh thlen niin FCI Aizawl Divison in Mizoram-a lian ber tur Godown a sakah dah tur a ni a, Food Corporation of India (FCI), Divisional Office buatsaihin buhfai phurtu Rel lo hmuahna hi neih a ni a, he hunah hian Supply Minister B. Lalchhanzova chuan Rel hmanga Sairang Rel Station a buhfai phurh thlena a lo awm ta chu Mizoram mipui tan thil chhinchhiah tlak tak nia a hriat thu sawiin, kan hma lawka Furpui lo thleng turah pawh a thlamuan sawt thu a tarlang a. Mizoram in thla khata buhfai kan mamawh zat chu quintal 97,000 a nih thu leh heng zinga quintal 55,000 chu FCI atanga kan dawn a nih thu Supply Minister chuan sawiin, quintal 41,000 chu a thlawn a kan dawn a nih thu leh a bak zawng chu Open Market Sale Scheme (OMSS) (Domestic) atangain quintal-ah 830 a lei a nih thu a sawi a. Buhfai quality tha zawk lei tuma hmalak chho mek a nih thu a sawi bakah tunah chuan Aizawl,Lunglei leh Lawngtlai FCI Godown-a dah tur chu Sairang Rel Station-ah hian a lo thleng tawh dawn a. Bairabi Rel Station-ah chuan Mizoram hmar lam Godown-a dah tur a thleng ve tawh thung dawn tih a sawi bawk.

Supply Minister B. Lalchhanzova chuan Sairang Rel Station-a buhfai lo thleng tur chungchang ah hian Sairang Dinthar khawtlang hruaitute leh YMA te nen pawh Meeting an neih tawh thu sawiin, Buhfai hi Pathianni (Sunday)-ah te, zing leh zanah te pawh a lo thlen hun a awm dawn a. Rel Station atanga Sairang Dinthar-a FCI Godown-a motor lian in a thiar a ngai dawn a. Chuvangin Sairang khawtlang nun pawh a tihbuaina chin a awm dawn tih a sawi a. Hemi kawngah hian Sairang mipuite dawhtheihna leh hriatthiamna pawh a ngen tak zet thu sawiin, Sairang mipuite harsatnaa hmalakpuitu tur Aizawl DC leh SP (Traffic) te hnenah pawh lawmthu a sawi bawk. He hunah hian Supply Minister hian FCI Divisional Office, Divisional Manager Bankim Phonglo leh a thawhpuite leh FCS&CA Official te chungah pawh lawmthu a sawi bawk.

He hun hi State Consultative Committee of FCI-a Chairman leh Rajya Sabha MP, K. Vanlalvena pawhin hmanpuiin FSCS&CA, Secretary Teresy Vanlalhruaii, Addl. Director C. Zadailova leh FCI Divisional Office-a Official thenkhatte an tel bawk a ni.