Larsap in MZU hmalakna te fakawm a tih thu a sawi

Mizoram Larsap General (Dr) Vijay Kumar Singh (Retd) chuan Mizoram University in zirna bakah vantlang rawngbawlna kawng hma an lakna te chu fakawm a tih thu a sawi.

Inrinni kaltaa Mizoram University (MZU) Convocation vawi 20-na a hmanpuina ah Mizoram Larsap General (Dr) Vijay Kumar Singh (Retd) chuan Convocation chu kum engemaw chen inthununna, beih hram hramna, hmasawnna leh tumruhna ataka lan-chhuahna hun mai bakah, hmasawn zel tura bultanna thar a nih thu a sawi a, MZU-in kawng hrang hranga hmasawnna a hmuh thu sawiin, “Tun dinhmunah chuan hmarchhak State-a zirna sang zawk zawm theihna ngaihhlut leh thang duang berte zinga mi a ni,” a ti a. Mizoram University-in NAAC A+ Grade a hmu chu lawmawm a tih thu leh zirna bakah vantlang rawng-bawlna kawnga an hmalaknate fakawm a tih thu a sawi a. Zirlaite chu khawvel hmasawn leh inthlak danglam zel mila insiamrem thiam turia fuihin, Degree chuan mawhphurhna a kengtel tih a sawi a, an thiamna leh finnate chu midang rawngbawl sak nana hmang tur leh Tlawmngaihna nunpui tlat thin turin a chah bawk a ni.

He hunah hian Chief Minister Lalduhoma pawhin zirlai hlawhtling thar zawng zawngte a lawmpui thu sawiin, Zirna tihhmasawn kawnga Mizoram sawrkar hmalaknate a tarlang a. Mizoram Engineering College chu kumin atangin Class tan tum a nih thu leh Mizoram State University kalpui tura hmalak zel a nih thu a sawi a. Mizoram sawrkar flagship Scheme Handholding chu thalai, mahni ke-a ding tura theihna leh thiamna neite tana buatsaih a nih thu sawiin, Scheme hmang tangkai turin thalaite a sawm a. University naupangte ni chunga Mizoram University-in NIFR 2025 ranking-ah India rama University tha 82-na a hauh pha chu chhuanawm a tih thu sawiin, hetiang dinhmun thleng thei tura thawktu zawng zawngte chungah lawmthu a sawi a, an kalzelna turah duhsakna a hlan bawk a ni.