KTP General Conf. a tiak ta

Mizoram-a Kohhran thalai Inkhawmpui lian ber, Kristian Thalai Pawl (KTP) General Conference vawi 61-na Ningani kalta zan atanga Saitual Public Playground-a neih chu nizan khan a tiak ta.
Kumin-a KTP General Conference-ah hian ‘Pathian tana mi hlang’ (Sam 119:1-3) tih chu thupui atan hman niin Speaker atan Rev. P.C. Lalropuia hman a ni a. Inkhawmpui tan zan hian Palai lawmna hun hmangin Synod Secretary Rev. B. Zohmangaiha chuan KTP Kumpuan Thupui ‘Chhungril takna’ (Sam 51:6) tih chu Pathian hnenah hlanin a tlangzarh a, Rev. John Raldosanga, Synod Moderator hnen atangin Pathian thuchah ngaihthlak a ni bawk.

Kumin-a KTP General Conference hian an thurel zingah Synod Charity Fund atan tum khat inkhawm Thawhlawm lakkhawm te, Youth Recreation Centre puala tum khat Inkhawm thawhlawm lakkhawm te, Central KTP in ruihhlo do kawngah chak zawka hmalak te, Street Ministy neih leh rawtna te, General Conference thlengtu puihna Bial tina Special budget siam rawtna te pawm a ni a. Kum 2030 KTP General Conference chu Zawlnuam leh Bawrai Pastor Bial ten inthlentawmin February ni 28 atanga March ni 3, 2030 chhungin neih a ni ang.

KTP inchhiarna-a a lan danin Bial KTP 218 leh Branch 917 awmin Branch 865 chu Mizo-ram chhunga mi a ni a, Branch 52 chu Mizoram pawna mi a ni a. KTP Member 1,81,131 an awm a, an zinga 1,09,456 chu mipa an ni a, hmeichhia 71,675 an awm bawk. Nikum chhung khan KTP member 569 an thi a, an zinga 502 chu mipa niin hmeichhe thi zat chu 67 an ni a, member thi awm lohna Bial 50 a awm a. Nikum chhung vek khan KTP Member nupui/pasal nei 3,435 an awm a, an zinga 1,610 (46.87%) chu Biak In a innei an ni a, hmundanga Innei 1,825 (53.13%) an awm bawk. KTP Branch member ngah ber chu Aizawl Mission Veng Branch niin member 1,447 an awm a, member nei tlem ber chu Peren KTP Branch (Kohima Bial) niin Member 3 an awm a ni.