Bawrhsap in ruihhlo dona a YMA hmalakna a fak

Serchhip Bawrhsap Paul L. Khuma chuan Ruihhlo do kawnga YMA hmalakna fakawm a tih thu sawiin, District huap ruihhlo ngai te puala Gospel Camping-a YMA inpekna chu a fak bawk.
Zirtawpni zan khan Sub-Hqrs. YMA Serchhip ten Sub-Hqrs. YMA Hall, Serchhip-a YMA Kumpuan, Ruihhlo Do hawnna an buatsaih a hmanpuina ah Bawrhsap Paul L. Khuma chuan ruihhlo do kawnga YMA te hmalakna fakin, Police te leh Excise Department te nen tha taka an thawh-hona avanga a lawm thu a sawi a. “Kan beih tur hi i hrechiang ang u,” tiin ruihhlo do kawnga awmze nei zawka hma la thei tur chuan ruihhlo chu eng nge a nih a, mihring ah engtin nge hna a thawh tih kan hriatchian a, kan zirchian a ngai a ni, a ti a. Serchhip District huap ruihhlo ngai Camping hlawhtling taka neih zawh tak chungchang sawiin, YMA te inpekna a fak a. Ruihhlo ngai ten an sim theihna tura tha thlah lova tang zel tur leh, a la ti ve ngai lo ten an tihchhin lohna turin mahni inchhung atanga bul tan theuh turin a sawm bawk a ni.

He hunah hian Serchhip Additional SP H. Lalduata pawhin YMA member ten ruihhlo do kawnga sawt zawka hma an lak theih nan sawrkar dan te leh hriattur pawimawh dangte inhrilhhriatna hun a hmang a. Serchhip-a Asst. Commissioner of Excise MS. Dawngkima pawhin he hun hi a hmanpui bawk a ni.