KMMTTP kawngpui kaltlanga Myanmar lam nen insumdawn tawnna sawrkar in a hriatpui lo

Chief Minister Lalduhoma chuan, Kaladan Multi Modal Transit Transport Project (KMMTTP) kawngpui hmanga Myanmar ram lam nena insumdawn tawnna chu sawrkar hriatpui loha kalpui a nih thu leh tun dinhmunah chuan dan anga kalpui theih a nih rih loh thu a sawi.

Assembly Session neih mekah nimin-a zawhna leh chhanna hunah ZPM Member H. Ginzalala zawhna kal zela KMMTTP chungchanga ZPM Member Dr. Lorrain Lalpekliana Chinzah zawh belhna chhangin Chief Minister Lalduhoma chuan, “KMMTTP Road hi a Schedule pangngai aiin a tlai tawh a, nakum-ah zawh turin Reschedule leh a ni,” a ti a. Zochachhuah piah lama Myanmar ram chu Burma sawrkarin a awp tawh lo tih sawiin, “Arakan Army (AA) thuhnuaia awm vek a ni tawh a, AA pawhin Full Cooperation min pe a, anmahni hian an nghakhlel a, a remchan angin kan indawr a, harsatna awm ang angte kan chinfel tlang zel,” a ti.

KMMTTP chuan nasa takin Mizoram a nghawng dawn tih sawiin Chief Minister chuan, “A lo chhuah hma atanga kan lo inbuatsaiha kan lo inrin lâwk theih nan Impact Study Team kan din a, Chairman-ah Pu T. Lalhlimpuia kan dah,” tiin Interim Report thehlut tawhin Final Report an thehluh hunah report atangin sawrkarin a bawhzui dawn thu a sawi a. “Tunah chuan tih vak ngaihna a awm rih lo a, sawtia a kal kala a kal mai a ngai. Aizawl atangin bungrua an thawnchhuak nasa hle tawh a, sumdawng ho hian bungrua khi lama thawnchhuah tur an rawn trip nasa. Chu pawh chu kan en deuh tawp mai a ni, dan ang taka thil ti turin Burma sawrkar dawr theih dinhmunah an ding bawk si lo,” a ti a. KMMTTP kawng chu mipuiin an hman mek tawh thu sawiin, “Zocha-chhuah-ah anmahni thu thuin pawlte an lo din ve a, sumdawnna a kal nasa tawh. Mahse, sawrkar hriatpui a ni lo a, hriatpui turin Land Custom Station kan la nei lo a, building pawh kan la nei lo a, a tihngaihna tak a awm rih lo; Unorganised-in an kal nawk nawk mai,” a ti bawk.

Myanmar lam atanga Lawngtlai District-a mi an rawn lut tam lutuk chu an vei thu sawiin Chief Minister chuan, “Kan NGO-te nen pawh kan sawi tlang. Saw saw dan deuh a nih loh chuan Social problem a siam thei dawn a, Assam Rifles leh BSF te kan brief reng a, lo strick rawh u kan in ti,” tiin Home Minister in Central YLA te a kawm dawn thu a sawi bawk.