Aizawl-ah National Standard size Volleyball Court siam tum a ni

Zonuna Kawlni /

Sports and Youth Services Minister Lalnghinglova Hmar chuan Aizawl Falkland Veng-a Mizoram Volleyball Association ramah National Standard size Volleyball Court siam tum a nih thu Assembly House a hrilh.

Nimin-a Assembly zawhna leh chhanna hunah zawhna chhangin SYS Minister chuan, MVA rama Standard size Volleyball Court siamna atan SASCI Part-IX hnuaiah cheng nuai 800 dah a nih thu sawiin, Mizoram State Sports Council hnuaia thawh tura tih a ni, a ti a; Sawrkar dan zawm chunga tih turte tih zawh hunah bul tan a nih dawn thu a sawi bawk. Mizoram-a Volleyball Court awmsa 15 chu cheng nuai 20 zel hmanga chei that tum a nih thu pawh Minister chuan sawiin, “Bul tan thuai tum a ni,” a ti a; Volleyball chu Empowering Mizoram Sports-ah a la tel loh thu sawiin, “Volleyball hi an Popular Sport zinga mi a ni a, tunah hian Volleyball leh Football te Empowering Mizoram Sports Fund lo lut leh turah kan telh dawn,” a ti.

Sports Minister chuan, Bawngva-a Mamit District Sports Complex sak mekah cheng vbc. 44 ruahman ah vbc. 25 pekchhuah ni tawhin Physical achievement chu 72% a nih thu leh, Mamit-a Residential Sports School sakna atana sum ruahman vbc 32.86 atangin vbc 29.97 pek chhuah tawh a ni a, Physical achievement 96% a nih thu a sawi bawk.

Comments

Post a Comment

I ngaihdan i sawi hian mipui ngaihdan i tarlang a ni!

Popular News (Last 30 Days)

Kawng siam dawn hnai

Zonuna Kawlni /
Image
National Highway-02 siam a nih hnuah he kawngpui in Serchhip Town chhunga a paltlang tawh loh, Chhiahtlang leh Serchhip khawpui chhung kawngpui siamthat hna chu PWD Serchhip Division ten an thawk dawn hnai nia thudawn niin hemi atan hian sum pawh ruahman a ni tawh nia thudawn a ni a. Tun tumah hian khawpui chhung paltlangtu Kikawn leh Sailiamkawn inkar chu Bituminous concrete a siam tum niin kawng siam hi zawhfel a nih hnuah chuan thla ruk (6) chhung Road cutting phalna pekchhuah a ni dawn lo a ni. Tun tuma kawng siam hna thawh turah hian New Serchhip North VC huamchhunga kawng kual nasa lutuk chu paih turin ruahmanna siam a ni bawk nia thudawn a ni.
Kimchang zawkin »

SEDBA hruaitu an thlang

Zonuna Kawlni /
Image
Serchhip District Boxing Association chuan kum 2026-2028 chhunga an hruaitu thlanna neiin President-ah C. Biakchhawna (New Serchhip) Sr. Vice President-ah BC. Liantluanga (Tuikhuah Veng); Vice President-ah R. Vanlalpeka (Vengchung), Secretary-ah David Laldintluanga (New Serchhip) Joint Secretary-ah T. Lalhuthanga (New Serchhip) leh V. Zosangliana (Leisang Veng); Treasurer-ah Prem Lalhmangaiha (Chanmari Veng) leh Fin. Secretary-ah David Lalrinmawia (P&E Veng) te thlan an ni.
Kimchang zawkin »

DIET Serchhip ten an titha

Zonuna Kawlni /
Image
Mizoram Board of School Education (MBSE) chuan nikum (2025) December thlaa Diploma in Elementary Education (D.EI.Ed) Examination a buatsaih result chu niminpiah khan a tichhuak a. District Institute of Education and Training (DIET) Serchhip-a Training mek te pawh an tha thawkhat a ni. DIET Serchhip atang hian 1st Semester-ah zirlai 48 ten Exam beiin mi 39 an pass a, a za zela 81.25 pass ang niin zirlai 9 ten Subject bat an nei a. 3rd Semester-ah zirlai 49 ten exam beiin an vaiin an pass vek thung a ni.
Kimchang zawkin »