KMMTTP hawn a nih hunah a tha zawnga hmang tura lo inbuatsaih a ngai tih Home Minister in a sawi

Home Minister K. Sapdanga chuan Kaladan Multi Modal Transit Transport Project (KMMTTP) hawn a nih hunah Mizoram in kawng hrang hrangin hmasawnna rahbi thar a kai dawn tih sawiin, a tha zawnga hman dan tur lo inbuatsaih chu hna hmasaa neih a ngai tih a sawi.

Home Minister K. Sapdanga hian Zirtawpni leh Inrinni khan Mizoram chhimlam District thenkhat te tlawhin sawrkar hotute leh tlawmngai pawl hruaitute a kawm a, Inrinni khan Zorinpui leh Lawngtlai-a Solid Waste Management System te tlawhin, Kaladan Multi Modal Transit Transport Project (KMMTTP) hawn a nih hunah Mizoramin kawng hrang hrangin hmasawnna rahbi thar a kai dawn tih sawiin, a taka hmuh a chakawm tawh thu a sawi a. He kawngpui zawhfel a nih chuan sumdawnna lian zawk kalpuiin, Lawngtlai bakah Mizoram hmun hrang hranga chengte tan hamthatna tam tak a thlen dawn thu leh chhungkaw tam tak tan eizawnna tha tak a siam dawn thu sawiin, hmasawnna hian a chhe zawnga Zoram mipuite a nghawng a hlauhawm hle tih a sawi a, tun atanga theihtawpa lo in râlrin leh a tha zawnga hman dan tura lo inbuatsaih chu hna hmasa a neih a ngaih thu a sawi a. Mizoram tana chhenfakawm leh malsawmna ni turin theihtawp chhuah a tul takzet tih sawiin, Malsawmna thlentu ni turin sawrkar, NGO leh Zoram mipuite inbuatsaih a pawimawh hle tih a sawi a. A bik takin Lawngtlai chu chhim kawtchhuah ropui a ni dawn tih tarlangin, neitu thinlung pu tur leh a tha zawnga chhawr tura rilru lo inbuatsaih tlat turin a chah nghal bawk a ni.

Inrinni tlai vek khan Home Minister K. Sapdanga hovin Siaha DC Mini Conference Hall-ah Ruihhlo do chungchang sawihona neih zui a ni a, he hunah hian ruihhlo do lam khawih Department Official bakah tlawmngai pawl hruaitute, MJA aiawh leh khawtlang hruaitute an tel a. Home Minister chuan Mizoram-a ruihhlo luhka bêr thin - hmar lam leh khawchhak lamah uluk taka ven leh hmalâk anih avangin hmun dangah hlet a chhuah hlauhthawn thuah ramri hrul District tlawhkuala, an thu leh hla ngaihthla paha sawihona hlawk-thlak tâk neih thaa an hriat avanga Siaha chu tlawh a ni tih a sawi a. Sawrkar leh tlawmngai pawl in ruihhlo do kawngah chak taka hma a lâk avangin ruihhlo man a to a, a ti thîn pawhin an nghei phah tih sawiin, “Ruihhlo ngaite hi damlo enkawla enkawl an nih hian an damlo dêr nasa a, hlahthlem bîk chi an niin a lang,” a ti.

He hun hi Siaha DC VL. Hruaizela Khiangte chuan kaihruaiin hmalak dan turte an sawiho a ni.