ILP dil zingah In sa-a inhlawhfa an tam ber

Zonuna Kawlni /

Kum 2024-25 leh kum 2025 atanga kumin (2026) February ni 16 thleng khan ramchhung mi State dang atanga Mizoram-a lo zin tum mi 3,36,808 te hnenah Inner Line Permit (ILP) pekchhuah an ni a, ILP dil zingah Insa-a inhlawhfa, Mistiri leh Helper an tam ber.

Assembly Budget Session neih mekah Home Minister K. Sapdanga chuan MNF Member Lalchhandama Ralte zawhna ziaka chhangin kum 2024-2025 khan ILP 1,63,368 pekchhuah a ni a, kum 2025 atanga kumin February ni 16 thleng khan ILP 1,73,440 pekchhuah a ni bawk tih a sawi a. Hei bakah hian Home Minister chuan Assembly Budget Session neih meka Lawngtlai West Bialtu C. Ngunlianchunga zawhna ziaka a chhan danin, kum 2024 leh 2025 chhunga ILP pekchhuah atanga sum hmuh chu Rs. 15,12,41,725 a tlin thu leh hemi kum chhung vek hian ILP nei lo leh ILP thi tawh thawnkir mi 1,117 an awm tih a tarlang bawk a ni.

Akashvani News Aizawl RTI zawhna chhangin, Mizoram District hrang hrang Deputy Commissioner Office te leh Shillong leh Silchar Mizoram House Deputy Resident Commissioner te chuan kum 2025 chhunga India khua leh tui State dang atanga Mizoram-a lo zin tum ILP pekchhuah zingah Assam mite an tam ber a, Assam bakah hian Bihar, Jharkhand, Tripura, Meghalaya, West Bengal, Uttar Pradesh, Odisha leh Rajasthan te chu a tam zualte an ni a, ILP dil zingah Insa-a inhlawhfa, Mistiri leh Helper an tam ber a, zinmi (tourist) leh sumdawnna thila lo zin an awm bawk tih an sawi a ni.

Comments

Post a Comment

I ngaihdan i sawi hian mipui ngaihdan i tarlang a ni!

Popular News (Last 30 Days)

Kawng siam dawn hnai

Zonuna Kawlni /
Image
National Highway-02 siam a nih hnuah he kawngpui in Serchhip Town chhunga a paltlang tawh loh, Chhiahtlang leh Serchhip khawpui chhung kawngpui siamthat hna chu PWD Serchhip Division ten an thawk dawn hnai nia thudawn niin hemi atan hian sum pawh ruahman a ni tawh nia thudawn a ni a. Tun tumah hian khawpui chhung paltlangtu Kikawn leh Sailiamkawn inkar chu Bituminous concrete a siam tum niin kawng siam hi zawhfel a nih hnuah chuan thla ruk (6) chhung Road cutting phalna pekchhuah a ni dawn lo a ni. Tun tuma kawng siam hna thawh turah hian New Serchhip North VC huamchhunga kawng kual nasa lutuk chu paih turin ruahmanna siam a ni bawk nia thudawn a ni.
Kimchang zawkin »

SEDBA hruaitu an thlang

Zonuna Kawlni /
Image
Serchhip District Boxing Association chuan kum 2026-2028 chhunga an hruaitu thlanna neiin President-ah C. Biakchhawna (New Serchhip) Sr. Vice President-ah BC. Liantluanga (Tuikhuah Veng); Vice President-ah R. Vanlalpeka (Vengchung), Secretary-ah David Laldintluanga (New Serchhip) Joint Secretary-ah T. Lalhuthanga (New Serchhip) leh V. Zosangliana (Leisang Veng); Treasurer-ah Prem Lalhmangaiha (Chanmari Veng) leh Fin. Secretary-ah David Lalrinmawia (P&E Veng) te thlan an ni.
Kimchang zawkin »

DIET Serchhip ten an titha

Zonuna Kawlni /
Image
Mizoram Board of School Education (MBSE) chuan nikum (2025) December thlaa Diploma in Elementary Education (D.EI.Ed) Examination a buatsaih result chu niminpiah khan a tichhuak a. District Institute of Education and Training (DIET) Serchhip-a Training mek te pawh an tha thawkhat a ni. DIET Serchhip atang hian 1st Semester-ah zirlai 48 ten Exam beiin mi 39 an pass a, a za zela 81.25 pass ang niin zirlai 9 ten Subject bat an nei a. 3rd Semester-ah zirlai 49 ten exam beiin an vaiin an pass vek thung a ni.
Kimchang zawkin »