Central YMA in lawmawm ti

Central YMA chuan Assembly Budget Session neih mekah 8th Schedule-a Mizo tawng telh a nih theihna tura Official Resolution pass a ni chu lawmawm an tih thu an sawi.

Central YMA chuan, ram Danpui 8th Schedule-a Mizo tawng dah a nih theih nan Central YMA chuan theihtawp in hma an lo la tawh thin tih sawiin, kum 1997-a East Lungdar-a YMA General Conference-in ‘Mizo tawng chu India Constitution 8th Schedule-ah telh a nih theih nan YMA-in hmalak ni rawh se’ tih a lo rel tawh bakah theihtawpin an bawhzui tih an sawi.

Central YMA chuan, Zofa hnam peng hrang hrangte tawng humhalh a, tihhmasawn a tulzia hriain hma an la thin tih sawiin, tuna an hman mek Mizo tawng chu an inbiakpawhna tawng tlanglawn ber a nih avangin inpumkhatna atan a pawimawh a, hma a sawn theihna tur leh a than zelna turin hma an la mek zel tih an sawi a, Assembly Budget Session neih mekah ram Danpui 8th Schedule-a Mizo tawng dah a nih ve theihna tura, “Eighth Schedule to the Constitution of India-ah Mizo tawng hi telh tura hma lak ni rawh se” tih Official Resolution Pass a ni chu lawmawm an ti takzet tih sawiin, 8th Schedule-a Mizo tawng telh ve a nih theihna turin theihtawp an chhuah zel dawn tih an sawi a ni.