Home Minister putluh pawm

Mizoram Legislative Assembly thutkhawm neih mekah Home Minister K. Sapdanga putluh ‘Motion for Reconsideration - The Mizoram Local Bodies Ombudsman Bill, 2025’ chu niminpiah khan pass a ni.

Home Minister K. Sapdanga chuan, he Bill hi nikum August ni 28 khan Assembly Session-ah pass a nih thu sawiin, Governor pawmpui tura thawn a nih hnuah Governor chuan he Bill chungchangah hian rawtna 2 a siam thu leh rawtna a siamte chu belhin House-ah ngaihtuah nawn tura putluh a nih tak thu a sawi a; Leader of Opposition Lalchhandama Ralte-in a thlawp thu a sawi hnuah House chuan lungrual taka pass a ni.

Nikum August ni 28-a pass he Bill-ah hian Governor chuan rawtna 2 a siam a, chungte chu Clause 3-ah Establishment & Appointment of Ombudsman atan hian independent appointment mechanism siam ni se, appointment siam turin Chief Minister, Speaker leh Leader of Opposition te nise a ti a; Clause 5-a Removal of Ombudsman chungchangah pawh Ombudsman hi ban a nih dawn chuan House Member-ten an hre ngei tur a ni a, House member thu zawng zawng hmun 5-a thena hmun 3-in an remtih chauhin ban nise tih te a ni.