Official Resolution pass vangin MILLTA an lawm

Mizo Literature and Language Teachers' Academy (MILLTA) chuan Mizoram Legislative Assembly in ‘Eighth Schedule to the Constitution of India-ah Mizo Tawng hi telh tura hma lak ni rawh se’ tih an pass chu lawmawm an tih thu an sawi.

MILLTA chuan thuchhuah siamin Mizoram Legislative Assembly pakuana Budget Session neih mekah, March ni 9, 2026-a Education Minister, Dr. Vanlalthlana Official Resolution putluh ‘Eighth Schedule to the Constitution of India-ah Mizo Tawng hi telh tura hma lak ni rawh se’ tih lungrual taka pass a ni chu lawmawm an tih thu hi tarlangin, Party hrang hrang aiawha thusawitute pawhin, India Constitution Eighth Schedule-a Mizo tawng telh ve a pawimawhzia hria a, Resolution an thlawp vek chuan a Hnam anga inlungrualna pawh a tarlang hle a an hriat thu an sawi a. India Constitution Eighth Schedule-a Mizo tawng telh ve tura dilna leh ngenna awm mek pawh he Resolution hian chak lehzuala a nawr theih ngei an beisei tlat tih an sawi bawk a ni.

Mizo Literature and Language Teachers' Academy chuan January ni 23, 2026-a Mizoram Education Reforms Committee (MERC) thukhawmin an rawtna, Mizoram chhung English Medium School zawng zawngah, kar khatah nikhat tal ‘Mahni Tawng Hman Ni’ (Home Language Day) siam a rawt pawh chu lawmawm an ti hle tih an tarlang bawk a. He rawtna pawh hi sawrkar-in a takin kalpui ngei se an duh takzet tih an sawi bawk a ni.