Excise & Narcotics Department Golden Jubilee lawmna hawnna hun Minister hovin hman a ni

Mizoram sawrkar-a Excise & Narcotics Department-in kum 50 a tlinna, Golden Jubilee lawmna chu nimin khan Excise & Narcotics Department changtu Minister Lalnghinglova Hmar hovin neih a ni.

Excise & Narcotics Department hi March 15, 1976 khan bul tan niin a tirah chuan ‘Excise & Taxation Department’ tih a ni a, hun kal zelah Excise Department tiha kalpui a nih hnuah kum 1996 khan ‘Excise & Narcotics Department’ tia kalpui a ni a. Nimin-a kum 50 an tlin lawmna hun Commissionerate of Excise & Narcotics Conference Hall-a neih ah hian END Minister chuan Golden Jubilee Monument hawngin Golden Jubilee kumah rilru thar pu a, Department chak leh tha zawk lantir turin thawktute a fuih a ni. END Minister Lalnghinglova Hmar chuan, “Kan Department hi miin min phurpui hle a, kan beisei phak bakin mipuiin min thlawp a. Kan hotute pawhin min duhsak a, kan thawhhona a tha tih a lanna a ni,” tiin Excise & Narcotics Department-a a thawhpuite fakin, “Theihtawp chhuahin kan bei chhunzawm zel bawk tur a ni.” a ti bawk.

Excise & Narcotics Department-a Commissioner Z. Lalhmangaiha kaihhruai he hunah hian END Minister chuan, “Bible-a kan hmuh chu kum 50-na hi Jubilee kum a ni a, Jubilee kumah chuan inngaihdamna te, zalenna kumah te an hmang thin. Chuvangin kan Jubilee kumah hian keini pawh kan inngaihdam a, thawhhona tha lehzual zawk a awm theih nan kan insiamthatna hun tur a ni,” a ti a. “Mihring atanga thlir chuan kum 50 hi kan vanglai a ni a, tawnhriat kan nei tha tawh a, thil tam tak kan lo hre tawh. Kan tha chak lai leh kan fin vanglai tak a ni. Chuvang chuan kum 50 tling tawh Department chu a fing tawh tur a ni,” a ti bawk.

Nimin-a Golden Jubilee lawmna hawnna hunah hian Excise & Narcotics Department Addl. Secretary Zothantluangi pawhin thu sawiin, “Ruihhlo hi Zoram in kan buaipui em em a, hei vang hian kan Department hi Department pawimawh tak a ni. Chhungkaw tinin kan buaipui a, hmalam kan pan zelna turah pawh kan ram tana chona lian a nih avangin chumi do tur Department a kan han thawk thei hi lawm takin, thahnemngai takin thawk ang u” tiin a chah a ni.

Excise & Narcotics Department Golden Jubilee lawmnaah hian nimin tlai dar 5:30 khan 'Golden Jubilee Mei Det programme' chu Commissioner of Excise hovin hman a ni a. March ni 18 (Nilaini)-ah Aizawl leh District dangah te Golden Jubilee pual a thisen pek runpui neih a ni dawn a. March ni 19 (Ningani)-ah Excise & Narcotics Department a thawktu hluite nen 'A Day with Pensioner' hun hman a ni anga, March 20 (Zirtawpni) chawhnu hian Golden Jubilee lawmna kharna hun hman a ni ang.