Luangmual Industrial Growth Centre-ah ram inpek (allot) theih a ni rih lo

Commerce & Industries Minister F. Rodingliana chuan nimin khan Assembly Session-ah Luangmual Industrial Growth Centre (IGC) chungchangah thubuai a awm avangin ram inpek (allot) theih a nih rih loh thu House a hrilh.

ZPM Member TBC. Lalvenchhunga zawhna chhangin Commerce & Industries Minister F. Rodingliana chuan Luangmual IGC-ah hian ram zau tak awm mah se, Court-ah thubuai a awm mek avangin ram inpek theih a nih rih loh thu a sawi a, “Min khing an awm a, Court-ah thahnemngai tak hmala tawhte chu hmalak chhunzawm kan dilpui a, an phal sak. Department lam erawh chu ram khawih an phal lo,” a ti a. Department lam chu a theih ang angin ram pek theih huna pek a nih theihna atan inhmkhua thu pawh sawiin, “Internal Road-te laiin, a map-te kan siam thar,” tiin Department lam chu an inrin vek tawh thu sawi bawk.

Siaha District Lopu-a Border Trade (Indo-Myanmar Border Trade) hmun tur ruahman theih a nih leh nih loh zawhna pawh chhangin Commerce & Industries Minister chuan, “Border Trade hi Central Subject a ni a, chuvangin, Indo-Myanmar Border a insumdawn tawnna nei tur chuan Central Sawrkar leh Myanmar Sawrkar-in inremna an neih a ngai a. Hetiang a nih avang hian Lopu, Siaha District-a Border Trade hmun tur ruahman hi Myanmar ram tualchhung buai avangin tun dinhmunah dan anga ruahman theih a ni rih lo,” a ti bawk.