District 8-a Tung chin tur kg 4500 vailiam Agriculture Minister in Aizawl atangin a vailiam

Agriculture & Farmers Welfare Minister PC. Vanlalruata chuan Mizoram District pariat (8)-a chin tur Tung chi kg 4500 chu nimin khan Aizawl atangin a vailiam a, he hunah hian Agriculture Department-a thawkte leh Tung chingtute an tel a ni.

Directorate of Agriculture & Farmers Welfare Office, Aizawl-a hemi puala hun hman ah Agriculture Minister PC. Vanlalruata chuan loneitute dinchhuah theihna tur chu a thil vei ber a nih thu sawiin, Tung chin chu Mizote rilru sukthlek nena inmil, Mizoram leilung mil bawk si a nih avangin loneitute tan thil tih chi tak a nih tur thu a sawi a. “Kum 1990 chho ah sawrkar hmalaknain Mizoram hmun hrang hrangah nasa taka chin lo ni tawh thin mah se a hralhna kawngah tunlai angin khawl leh inbiakpawhna te a la that tawk loh avangin a hlawhtling ta lo a ni,” a ti a. Tunah hian India ramah Tung hriak (Tung oil) mamawhna a san zel thu leh a tam zawk chu ram dang atanga lakluh vek an nih avangin Mizorama kut hnathawktute tan Tung chin chu tharthawh leh tlak nia a hriat thu sawiin, Kum 2025 atang khan Agriculture Department kaltlangin Saitual, Khawzawl leh Serchhip District-ah te awmze nei zawka chin tan leh a nih thu a sawi a. Kum 2026-ah phei chuan zau zawkin District 8-a khaw 105-ah te chin a nih tur thu a sawiin, Agriculture Department-a thawktute chu Farmer-te tan thahnem ngaia, uar lehzuala zirtirna te kalpui thin turin a chah bawk a ni.

Nimin-a he hun hman hi Agriculture Department Secretary Ramdinliani chuan kaihruaiin India rama Tung lei leh hralh lama hmalatu lian, Himanshu Bansal, Vorya Enterprise, New Delhi pawh biakhmuhtheihna kaltlangin a rawn telpui a. India ramah Tung lei tur duhkhawp an hmuh zawh loh avangin China leh Vietnam atangte a an lei nasat thu a sawi a; tunlai khawvel Oil mamawhna sang chho zelah Tung chingtute tan a hralhna kawngah harsatna a awm loh tur thu sawiin, Tung lei tura farmer-te nen inremna siam a duh thu pawh a sawi bawk a ni.

Tung hriak hi bungrua (furniture) tih tletna atan te, Varnish, Paints leh Leather tih tletna atan te leh thil dang hrang hrangah an hmang nasa hle a; chin a nih atanga kum 3 bawr velah an rah tan thei a, kum 30 bawr vel thleng an rah thei a ni. A kung kar-ah hian thlai dang Vaimim leh Behliang te chin theih bawkin heng Vaimim leh Behliang te hi Central sawrkar ruahman angin NAFED/NCC ten Minimum Support Price (MSP) in an lei thei bawk a ni.