PMUY Scheme hnuaiah Mizoram-ah Gas Connection 1,200 vel pek a ni tawh
Thudawn danin PMUY Scheme hnuaiah hian India-a chhungkaw nuai 25 vel a thlawnin Gas Connection hi pek tum a ni a, hmarchhak bial tan nuai nga vel ruahman niin a ti hmasa piang hnenah connection hi pek tura ruahman a ni a. Gas connection hi tih mek zel niin March 31, 2026 thleng hun hawn a ni a, a zawh (full) hun tur sawi theih a la ni lo.
He Scheme hnuaiah hian BPL chhungkaw harsate chu a thlawna Gas Comnnection pek zel tur niin e-KYC pawh Distributor-ten an tihsak zel tura ruahman a ni a. Hetihlai hian Gas Connection dil zingah Ration Card leh Adhaar inmil lo a awm thin avangin chhungkaw engemaw zat chuan harsatna an tawk nia thudawn a ni.
Mizoram Consumers’ Union (MCU) President Thanglura chuan PMUY Scheme hnuaiah hian Gas Connection hi pek zung zung tura tih a nih laiin a buaipuitu Gas Distributor-ten an thawk chak tawk lo nia an hriat thu a sawi a, “Gas Distributor zingah tha taka buaipui an awm laiin thenkhat chuan an ti tha tawk lo hle niin kan hria a. Sawrkar leh Indian Oil Corporation (IOC) lamin theihtawp an chhuah laiin chhuanlam eng engemaw siam an awm niin kan hria a, pawi kan ti hle a ni,” a ti.
PMUY hi hmeichhia, kum 18 tling tawh, BPL Card nei emaw, PMUY list-a chhungkaw harsa bik anga lang, chhungkaw khatah Gas Connection dang la nei lo hmeichhia ten an dil thei a, Sawrkarin Gas Cylinder man sum pek tur Rs. 1,600 tum sakin a hmasa ber atan Gas thuk (Stove) leh Gas bur khat (refill) a thlawnin pek tur a ni. PMUY hi December 1, 2025 atanga hman tan niin March 31, 2026 hnu lamah chuan System-ah a lut thei tawh dawn lo nia thudawn a ni a, tun dinhmunah PMUY hnuaiah hian Mizoram-ah Gas Connection 36,031 a awm tawh a. PMUY Scheme hnuaiah hian a ti hmasa apiangte hnenah Gas connection hi pek mai tur a ni.
Comments
Post a Comment
I ngaihdan i sawi hian mipui ngaihdan i tarlang a ni!