ZPM Media Cell Chairman in IAF ram lei a sawifiah

Revenue Minister leh ZPM Media Cell Chairman B. Lalchhanzova chuan Indian Air Force (IAF) in Lengpui leh Sihphir ram a lei chungchang an zirchian hnuin MNF in ram hralh a lo tum niin a sawi a, hemi chungchang hi eptuten CBI chhuitir an duh chuan chhuitir tura an phut thu leh an lo ngaihchan dawn thu a sawi.

Inrinni khan ZPM Media Cell Chairman a nihnaa party mi te nen Aizawl Press Club-a thuthar thehdarhtute an kawmnaah he thu hi Revenue Minister chuan a sawi a. Ram himna turin rilru fim tak pu chungin ram lak dan, Acquisition dan dik takin IAF hnenah ram hi hralh ni loa hawh tura hmalak a nih thu a sawi a. He thilah hian Chief Minister Lalduhoma kut a fai tih an hriat thu sawiin, kut fai lo anga an awm a nih chuan lipse an ngam a. Revenue Minister a nih ang pawha lipse a ngam thu sawiin, mipui kuta awm an nih thu leh he thil hi politics inbeihna ringawtah tawp lo se a duh thu a sawi a ni. 

Minister chuan uluk taka Document te an chhui leh an indawr tawn dan an en letin MNF sawrkar lai khan lo ti fel hman ta se, IAF hnenah hian chatuan atan Mizoram leilung hi an lo hralh fel hmak dawn tihna a lo ni tih a sawi a, MNF sawrkar leh IAF indawrnaah chuan hralh tumna - outright purchase vek a nih thu sawiin, Mizoram-in inhumhimna a neih, Bengal Eastern Frontier Regulation Act, 1873 te, Mizoram Land Revenue Act, 2013 te sawilan a ni ngailo tih a sawi a, Outright purchase an remtihlohna sawi lang miah lovin IAF hnenah hian ram hi hralh an lo tum hle niin a sawi a. Hei hi document hrang hrang pawhin a tihchian thu sawiin, ZPM sawrkar chuan thil awm dan a lo hriata a zirchian hnuin MNF in ram hralh a lo tum dan, Outright purchase chu a him lohzia hriaa Land Acquisition dan ang thlapa hma lak tha a tih angin hma an lak zui thu a sawi a ni.