Inpumkhat turin midangte hnam ziarang leh nunphung kan hlut thiam a pawimawh thu sawi

Mizoram Larsap General (Dr) VK. Singh chuan inpumkhat turin midangte hnam ziarang leh nunphung kan zaha kan hlut thiam a pawimawh thu a sawi.

Zirtawpni khan Aizawl-a Lok Bhavan-ah 'Ek Bharat Shreshtha Bharat' hmalakna hnuaiah Manipur, Meghalaya, Tripura leh Uttar Pradesh State bakah Dadra and Nagar Haveli & Daman and Diu-te Foundation Day lawmna neih a ni a, he hunah hian Larsap General (Dr) Vijay Kumar Singh chuan Prime Minister hmalaknaa kalpui 'Ek Bharat Shreshtha Bharat' chuan India ram hnam ziarang hausa tak chawilar a tum tih sawiin, “Kan kalna apiangah hnam ziarang leh nunphungte midang hmuh theiha kan phochhuah a, keini pawhin an hnam ziarang leh nunphungte kan zir hian inhriat-pawhtawnna leh inunauna a siam a ni,” a ti a. India ram chu ram ropui leh zau tak a nih avangin a ram mipui zinga tam zawkin midangte hnam ziarang leh nunphung an hriatchian loh fo thin thu sawiin, “Inpumkhat turin midangte hnam ziarang leh nunphung kan zaha kan hlut thiam a pawimawh hle a ni,” a ti a. State leh Union Territory-te chanchin tawi chhinchhiah tlak tak takte tarlangin, “Danglam viau mah ila, hei tak hi kan chakna hnar leh hmun khata min phuarkhawm tlattu a ni, a ti a. State dang atanga Mizorama awmte leh Mizote chu midang hnam ziarang leh nunphungte a tam thei ang ber zira inhriatpawhtawnna tha siam tum turin a chah bawk.

Manipur, Meghalaya leh Tripura-te hi January ni 21, 1972 khan North Eastern Region (Re-organisation) Act, 1971 hmangin State puitlina hlankai an ni a. Uttar Pradesh hi January ni 24, 1950 khan State-a puan a ni bawk. Union Territory pahnih Dadra & Nagar Haveli leh Daman & Diu-te hi January ni 26, 2020 khan Union Territory pakhata chhunfin an ni.

Ek Bharat Shreshtha Bharat programme hian India rama State leh UT hrang hranga cheng hnam hrang hrang, hnam ziarang leh nunphung inang lo tak takte inkara inpawhna tha zawk siam leh an inkara inhriatthiam tawnna nasa zawk siam a tum a. Ek Bharat Shreshtha Bharat programme kaltlang hian India rama State leh UT hrang hrangte Foundation Day lawmna chu Mizoram-a Lok Bhavan-ah Larsap kaihhruaiin June, 2023 atang khan buatsaih tan a ni.

Tun tuma hun hman hi Addl. PS to Governor Lalhruaitluangi chuan kaihruaiin hun buatsaih chhan a sawifiah a. Manipur Larsap Ajay Kumar Bhalla, Meghalaya Larsap C.H. Vijayashankar, Tripura Larsap Indra Sena Reddy Nallu leh Uttar Pradesh Larsap Anandiben Patel-i te thuchah bakah heng State leh UT te chanchin tarlanna video thlirho a ni a. Heng State leh UT te chanchin ngaihthlak niin RIPANS leh Govt. Johnson College zirlaite'n hnam lam an entir bawk a ni.