Zawlnuam khuaa Sangha Tin siamna khawl Cooperation Minister in a hawng

Zawlnuam Fishery Cooperation Society Ltd. hnuaia Sangha Tin siamna khawl chu nimin khan Cooperation Minister PC. Vanlalruata chuan a hawng.

India hmarchhaka Sangha Tin siamna khawl hmasa ber Zawlnuam-a hawnna ah hian Cooperation Minister PC. Vanlalruata chuan Sangha Tin siamna kan kawtkai-a hawn a ni ta chuan Sangha tharchhuah kan hralh lehna kawngah nasa takin kuthnathawktute a pui dawn tih sawiin, “Sangha kan manin a lian chiah hralh a nuamin, a man pawh a pangaiin a hralh theih thin a, tunah chuan a te deuh zawk pawh Sangha Tin-ah siam theih a ni dawn ta hi a tha hle a, chutihrual chuan ei leh in siamtu kan nih avangin fimkhur tak leh mipuite'n an duh tur ngeia siamchhuak tura kan inbuatsaih a tul dawn,” a ti a. Sangha Tin siamna hmunhma leh hmalak leh zelna turah sawrkarin theihtawpchhuah a in huam thu sawiin, inpawh tlang taka thawkho zel turin a sawm bawk.

He hunah hian ARCS Lalthangfala chuan Technical Report pein, Zawlnuam Fishery Cooperation Society Ltd. hnuaia Sangha Tin siamna khawl hi kum 2024 July thla khan Cooperative Department chuan Sawrkar laipui hnenah thlen sakin, Integrated Cooperative Development Project kaltlangin cheng nuai 65 hmuh a ni a, khawl lei nan cheng nuai 40 hman niin, a In sak nan cheng nuai 25 hman a ni a. Sangha Tin siamna ah hian vawikhatah Sangha kg 50 siam theih niin chu chu a Tin chuan Tin 120 a ni a, hemi siamchhuak tur hian darkar 2 chhung hun hman a ngai a ni. He khawl an chahna ah hian a tirah harsatna neiin Rajasthan lamah phurh bo a ni a, Mizoram Police ten theihtawp an chhuahpuina avanga Zawlnuam an thlen theih avangin Society te chu Mizoram Police chungah an lawm hle a ni.

Nimin-a Sangha Tin siamna khawl hawnna hunah hian Bialtu MLA, Robert Romawia Royte chu khual zahawm nin Mizoram-a thil la awm ngai lo a Bial in an nei leh hawn theih a ni ta chu lawmawm a tih thu a sawi bawk a ni.