Ni 5 chhung State Day of Prayer hmang dawn

State Day of Prayer Committee bultumin kumin hian a tum thumna atan ‘State Day of Prayer’ hman a ni leh dawn a, thupui atan 'I din thar leh ang u' (Nehemia 2:17) tih hman a ni ang.

State Day of Prayer Committee hruaitute chuan nimin khan Aizawl Press Club-ah State Day of Prayer hman dan tur chungchang ah hian thuthar thehdarhtute an kawm a, ‘State Day of Prayer’ chu Party leh sawrkar hmalakna ni lovin, Kohhran hrang hrang intelkhawm hmalakna a nih thu leh tawngtai ho tura inbuatsaihna atan senso ngaite pawh mi thahnemgai ten an thawh thin thu an sawi a, kuminah hian cheng nuai 15 ruahman a nih thu an sawi bawk.

Kumin hian State Day of Prayer hi Lammual-ah February 16 atanga 20, ni 5 chhung hman a ni dawn a. Kumin 2026 hi Mizoram-a Harhna a thlen kum 120-na niin Harhna a lo thlen leh theih nana tawngtai chu he State Day of Prayer in a tum bulpui ber pakhat a ni a, February ni 16-19 chhung chhun lamah tawngtaihona hman tur a ni a, February ni 18 zan dar 8:00 atanga a tuk zing dar 6:00 thleng tawngtai hona neih tur a ni a, Lammual leh pandal hlan nghal a ni ang. February ni 19 zan dar 8:00 atanga a tuk zing dar 6:00 tawngtaiin February ni 20-ah nileng-a tawngtai a ni ang.