Mizoram-a National Highway te dinhmun Chief Minister hovin thlirho a ni

Chief Minister Lalduhoma hovin nimin khan a Pisa-ah Ministry of Road Transport & Highways hnuaia Mizorama hnathawh mekte thlirho a ni a, Thenzawl kaltlang Aizawl leh Lunglei inkar kawngpui National Highway a puang tura ngen ah Aizawl leh Thenzawl chin chu pawmpui a nih tawh thu tarlan a ni.

Chief Minister Conference Hall-a thutkhawm neih ah hian Chief Minister Lalduhoma chuan, “Minister of Road Transport & Highways Pu Nitin Gadkari hi kan tan a tha em em a, kan dil apiang min tihsak deuh zel thin. Kan hriat angin Vairengte - Aizawl Four Lane-ah pawh Entity pahnih zangnadawmna pek min phalsak hial a, hetiang hi hmundang ah a la thleng ngai lo hial ang. A chungah hian kan lawm hle a ni,” tiin ruahtui dawng tam ram kan nih vanga kan kawngpuite Rigid Pavement tawh zawk tura an dilna pawh uluk taka an zirchian mek thu a rawn hrilh thu a sawi bawk.

He thutkhawm ah hian Ministry of Road Transport & Highways hnuaia Mizorama hnathawk mekte leh an hnathawhna lama harsatna an tawh hrang hrangte sawiho a ni a, MoRTH hnuaiah hian NHIDCL in Mizoram-a Project an khawih mek te chu km 37.42-a thui Lunglei to Chhumkhum te; km 37.52-a thui Chhumkhum to Tlabung te; km 30.41-a thui Pawlrang to Rulchawm Section of Tuivai to Keifang te; km 28,24 a thui Zorinpui to Longmasu te; km 90.11-a thui Vairengte to Sairang (Package 3 atanga Package 8 thleng) bakah km 4.6-a thui Aizawl by-pass Road package 2 leh km 19.3-a thui Aizawl by-pass Road Package 3 te a ni a. Km 11-a thui Aizawl by-pass Road package 1 chu thawh tan mai tur a ni bawk.

Heng an hnathawh meka harsatna an tawhte leh a bawhzui dan tur sawiho niin National Highway No 2, Aizawl - Tuipang kawng thawh zawh tawha harsatna la awmte pawh Chief Minister chuan, tuna Arbitrator-a case lut mekte dinhmun chu Meeting neih leh hunah kimchang taka report turin a ti a. Thingfal-a kawng laihin a nghawng Biak In, School leh mimal In chhiate umzuina tharlam ber pawh hre tawh turin a ti bawk.

Heng bakah hian Mizoram PWD enkawl National Highway hrang hrangte dinhmun pawh he hunah hian thlirho a ni a, PWD enkawl te hi NH. 154/6 Assam Border to Bilkhawthlir; NH. 54/6 Sairang to Zemabawk; NH. 6 Zokhawthar to Cham-phai; NH. 150/2 Tuivai to Seling; NH. 44A/108 Langkaih to Sairang; NH. 6 (Spur) Bairabi to Mamit; NH. 306A Vairengte to New Vervek; NH. 502A Lawngtlai to R. Zocha leh NH. 502 Zero Point to Siaha te awmin heng te pawh hi uluk taka thlirho a ni a. Sawrkar laipuia thlen tur thil pawimawhte an ngaihtuahho nghal bawk a. PWD hian National Highway siamthat hna hmun engemaw zatah an thawk mek a. Darlak leh Tuidam inkar kawng chu chak zawka bawhzui tura tih an ni bawk.

Chief Minister-in Aizawl-Thenzawl-Lunglei (ATL) Road National Highway-a puang tura sawrkar laipui a dilna chu Union Home Ministry chuan Aizawl leh Thenzawl chin a rawn pawmpui (recommend) tawh thu leh MoRTH ngaihchan mek a nih thu tarlan a ni a. PWD Minister kaihhruaina hnuaiah Aizawl khawpui chhung kawngpui siamthat hna thawh mek a nih thu leh tunhnai khan District Capital 11 kawngpui siam-thatna tur sum belh leh an nih thu tarlan a ni bawk a. Hlimen-a Transport Department ram chu Vehicle Scrapping Centre dah theih tura peih thawkhat a nih tawh thu leh Vehicle Scrapping kalpui chak hi SASCI atanga lawmman dawn theihna a nih avangin ngaihpawimawh bika neih nise tih te sawilan a ni bawk.

Nimin-a thutkhawm ah hian PWD Minister Vanlalhlana bakah Minister pahnih, Lalthansanga leh B. Lalchhanzova te pawh an tel a, PWD leh sawrkar Official te bakah NHIDCL hotute leh Aizawl leh Kolasib District chhunga CALA te pawh telin DC dang ten Online hmangin an zawm bawk a ni.