Valentine's Day denchhenin kumin ah thisen Unit 614 pek a ni

Kumin hian Valentine's Day pualin Mizoram-a Blood Bank hrang hrangah mi tlawmngai ten thisen Unit 614 pein Serchhip-ah pawh Unit 34 pek a ni.
Mizoram-ah hian kum 2010 atang khan inhmangaihte ni tia sawi thin, February 14-a Valentine's Day denchhen hian thisen pekna hun buatsaih thin a ni a, hei hi kumtin kalpui chhunzawm a ni ta zel a, February 14-a thisen pek a remchan loh pawhin he ni denchhen hian thisen pekna hun hi hawihawt thin niin kum 2010 atanga kumin thleng hian Valentine's Day denchhen hian thisen Unit 12,235zet pek a ni tawh a ni. Kum 2010-a Valentine's Day denchhena thisen pek a nih atanga thisen pe an tam ber kum chu kum 2020 kha niin hemi kum hian mi 1,131-in thisen pe in Thisen pe an tlem ber kum chu a tan kum, kum 2010 kha a ni a, mi 146-in thisen an pe a ni.

Kumin ah pawh Valentine's Day denchhen hian Mizoram-a Blood Bank hrang hrangah thisen pekna hun hi buatsaih leh a ni a, hriat theih chinah kumin hian thisen Unit 614 pek niin mi tlawmngai te thisen dawng tam ber Civil Hospital, Aizawl-ah mi 277-in thisen an pe a Zoram Medical College & Hospital-ah mi 71 in an pe bawk. Aizawl District hi Lunglei District-in dawtin mi 86-in thisen an pe a, Champhai District-ah mi 80 in thisen an pe bawk. Heng bakah hian Serchhip District-ah mi 34 in thisen an pe a, Siaha leh Lawngtlai District-ah mi 33 ve ve-in an pe bawk. Valentine's Day puala thisen pek ah hian ‘Show Love, Give Blood’ tih chu thupui atan hman thin a ni a, tunah chuan Mizoram State AIDS Control Society (MSACS) leh Association for Voluntary Blood Donation (AVBD) ten he hmalakna hi an kalpui thin a ni.