India Hmarchhak-a Cancer Doctor rual intawhkhawmna Aizawl-ah neih a ni

India Hmarchhak-a Cancer Doctor rual intawhkhawmna, Association of Oncologists of Northeast India (AONEI) Annual Conference vawi 21-na chu Zirtawpni zan atang khan Aijal Club-ah neih niin nimin khan zawhfel a ni.

Mizoram State Cancer Institute-in a thlen India hmarchhak a Cancer Doctor rual inzawmkhawm pawl, Association of Oncologists of Northeast India (AONEI) inkhawmpui vawi 21-na hi Zirtawpni zan khan Aijal Club-ah Health & Family Welfare Minister Lalrinpuii chuan a hawng a, Mizoram chu India rama Cancer vei tamna hmun a nih thu leh National Cancer Registry Programme hnuaia report hrang hrangah tarlan a nih danin Mizoram leh hmarchhak State-te chu Chaw kawng, Chuap, Hnute leh Chhul hmawr Cancer hluarna hmun a nih thu a sawi a. India rama Cancer Doctor rualte intawhkhawmna hun Mizoram in a thleng chu Cancer dona kawngah thil lawmawm tak a nih thu leh Mizoram-a damlo, a bikin Cancer natna veite tan rah duhawm tak chhuah ngei se a duh thu a sawi a. Mizoram-a Cancer hluar lutuk tih ziaawmna turin theihtawpa hmalak a nih thu sawiin, Mizoram sawrkar leh JICA tangdunin cheng vbc. 700 senga Zemabawk-a Mizoram State Super-Specialty Cancer & Research Centre an din tur pawh hna thawh tan a nih tawh thu a sawi a, Thling thlak (Bone Marrow Transplant) theihna tur te, Nuclear hmanga enkawlna chi hrang hrang, PET Scan leh Cancer endikna chi hrang hrang tih theihna turte pawh dah a nih tur thu a sawi bawk.

AONEI hi kum 2004 khan Dr. C. Bhuyan (Medical Oncologist) leh Dr. Judita Syiemlieh (Radiation Oncologist) ten Cancer Doctor dang 20 velte nen tangho-a an din a ni a. India hmarchhak a Cancer Doctor-te bakah Doctor thiamna chi hrang hrang neite nen inthlunzawmin an thawkho bawk a. AONEI inkhawmpui hi kumtin in hmarchhak State in an inthlenchhawk thin a, ramchhung hmun hrang hrang atangin Member za chuang telin, India ram hmunpui zawka Cancer chungchanga thiamna ril tak tak nei - Dr. Pankaj Chaturvedi, Director, ACTREC, Mumbai te; Dr. Dodul Mondal, Radiation Oncologist, Max Hospital, Delhi leh midangte pawhin thu an sawi a ni.