Union Budget pharh a ni; Mizoram sum a pun beisei

Kum 2026-27 atana sawrkar laipui sum ruahman, Union Budget chu nimin khan Union Finance Minister, Nirmala Sitharaman-i’n Lok Sabha-ah a pharh ta.

Finance Minister chuan Budget chu thalaite tihchakna tur Budget nia sawiin, Budget chu mawhphurhna chi thum behchhana duan a ni, a ti a, ei leh bar lama chak zawka hmasawnna turte, mipui hmasawnna tur leh chhungkua, hnam leh bial tinte hnena an mamawh pek leh an dinchhuahna tur ruahmannate a tel a ni, a ti. Budget-ah hian Khadi, Handloom leh Handicraft tihchakna tur Mahatma Gandhi Gram Swaraj kalpuina turte, Textile Sector tana National Fibre Scheme leh National Handloom & Handicraft te thuikhawmtu tur, Integrated Programme hnuaia Mega Textile Park din tura rawtna te a tel a, National Institute of Pharmaceutical Education & Research thar pathum dinna tur leh Institute awmsa 7 thuam thatna tur a tel bawk. 

Budget tharah hian Cancer natna veite enkawlna damdawi chi hrang hrang 17-ah Chhiah tih bo a ni a, ramdang atanga damdawia inenkawl duhte an pun theih nan Regional Medical Hub 5 din a ni dawn a, All India Institutes of Ayurveda thar 3 din tum a ni bawk. Arunachal Pradesh, Sikkim, Assam, Manipur, Mizoram leh Tripura-ah Buddhist Circuit tihhmasawnna tur scheme kalpui tum a ni a, Tezpur leh Ranchi-a rilru lama harsatna neite enkawlna hmun, National Mental Health Institute-te chu Regional Apex Institution dinhmuna hlangkai turin thuamthat tum a ni bawk.

Union Budget pharh takah hian tun sawrkar kum kal lai (2025-2026) a Mizoramin sum a hmuh atanga chhuta sawrkar kum thar tur (2026-2027)-a Central sawrkar atanga sum a hmuh tur chu za zela 23.59 a pung tura chhut a ni a. Hei hi Finance Commission 16-na-in Central sawrkar leh State sawrkar sum insem dan tura State-te'n za zela 41 an chan tur anga chhut a ni. Mizoram hian Central sawrkarin Chhiah chi hrang hrang atanga sum a dawn chu tun sawrkar kum kal lai-ah hian cheng vbc. 6,964 leh nuai 85 a ni a. Finance Minister thusawi atanga a lan dan chuan sawrkar kum tharah hian Mizoram chuan cheng vbc. 8,608 leh nuai 8 dawng tura chhut a ni a, a punna hi cheng vbc. 1,643 leh nuai 23 ni tura ngaih a ni. Hei hian tun thla a Finance changtu Chief Minister Lalduhoma'n Assembly-a a pharh tur sawrkar kum thara Mizoram budget pawh a tha zawnga nghawng lian tham a neih beisei a ni.

15th Finance Commission-ah khan Mizoram in Share of Central Taxes atanga a chan chu 0.5% niin 16th Finance Commission-ah chuan 0.564% a ni tawh dawn a, 15th Finance Commission-ah khan Central-a chhiah tlingkhawmah Mizoramin cheng nuai 1 zelah Rs. 205 a chang a, 16th Finance Commission-ah chuan cheng nuai 1 zelah Rs. 231.24 a chang tawh dawn a, NE-ah Mizoram leh Assam chiah a pung a ni.