Ropuiliani Women Farmer Producer Company Ltd. ten State pawnah Mizo Hmarchate an thawnchhuak

Serchhip District chhung Chhingchhip khuaa inbun, Ropuiliani Women Farmer Producer Company Limited Member (Shareholders) te hmalakna in Mizo Hmarchate chu Karnataka-a hralh turin Zirtawpni khan RD Minister Prof. Lalnilawma chuan Chhingchhip-a MIFCO Complex atangin a vailiam.
Metric Ton 5-a rit heng Hmarchate vailiamna puala inkhawm tawi neih ah Rural Development & Administration Department changtu Minister Prof. Lalnilawma chuan Ropuiliani Women Farmer Producer Company-te hmalakna chu fakawm a tih thu sawiin, “Mizo Hmarcha bik hi ram pawnah kan thawnchhuak tawh thin a, Mizo hmarcha a nihna a lang tawh thin lova, chuvang chuan Mizoram atanga thawnchhuah a ni tih lantir zel a ni tawh,” tiin Mizo hminga a kal tawh thu a sawi a. Kan thlai tharte kan thawnchhuah dawn chuan a grading uluk a tul thu leh chuti a nih loh chuan belhchian kan dawl lovin rei kan daih dawn lo tih a sawi a. Tun tuma Mizo hmarcha thawhchhuahna hun an hman hian hian rah tha chhuah se a duh thu a sawi a. Thlai thar hralhna chungchangah harsatna neuh neuh a awm thin chu MzSRLM leh sawrkar atang leh company atangte pawhin theihtawp an chhuah zel tur thu a sawi bawk.

Ropuiliani Women Farmer Producer Company Limited hi Mizoram State Rural Livelihoods Mission (MzSRLM), Rural Development & Administration Department hnuaia Sub-Scheme pakhat, Mahila Kisan Sashaktikaran Pariyojana (MKSP) Value Chain Project kaltlanga din niin he Company kaltlang hian MzSRLM hnuaia Self Help Group member hmeichhiate chu Shareholders a ziahluh an ni a. Producer Company kaltlang hian Sawhthing, Mizo Hmarcha leh Aieng hralhna mumal zawk an neih theih nan hmalakna kalpui mek a ni. He hmalakna kaltlang hian Mizoram a District 7 (Champhai, Khawzawl, Saitual, Aizawl, Serchhip, Mamit, Kolasib District) leh RD Block 16 (Champhai, Khawbung, Khawzawl, Ngopa, Phullen, Aibawk, Thingsulthliah, Darlawn, Serchhip, East Lungdar, Reiek, West Phaileng, Zawlnuam, Thingdawl, Bilkhawthlir leh Kawrtethawveng RD Block) tuamchhuah vek niin Board of Directors mi 5 leh First Subscribers mi 12 an awm mek a. He Project huamchhunga khaw 154 chuang atangin shareholders mi 6346 an inziaklut tawh a, he Company enkawl tur hian Staff mi 9 awm mekin Technical Support Agency hi Foundation for Development of Rural Value Chains (FDRVC) te an ni.

Kum 2025-2026 (December 2025 leh January 2026) chhungin he Company hian khaw 35-a a Member te atangin Mizo Hmarchate MT 15.2 leisak tawhin tun thlenga a leisak zinga MT 5 chu Karnataka-a Sus Agri Development Pvt. Ltd. hnenah hralhchhuah niin heng te hi vailiam a ni a. Hei bakah hian MT 7.5 chu Relentless Foods Pvt. Ltd., Odisha hnena hralh mai theih turin Company Warehouse-ah hian khawih danglam theihloh (sealed) a dah that a ni bawk.

Huam zau zawk leh chak zawka he Company a kal chhoh zel theih nan member inziahluh runpui chu January leh February, 2026 thla chhung awh turin MzSRLM leh Company Staff ten beihpui an thlak chho mek a, he Member Mobilization Drive zawh a nih hnuah Company chuan February, 2026 chhungin a Member (shareholders) te hnen atangin Sawhthing leh Aieng leisak leh turin ruahmanna a siam mek a ni.

Karnataka-a Sus Agri Development Pvt. Ltd. hnena hralh tur heng Hmarchate vailiamna hun hi MzSRLM Chief Executive Officer Zosangzuali chuan chuan kaihruaiin sawrkar hotute leh Company-a thawktute bakah Shareholders ten an telpui bawk a ni.