Sub-Hqrs. YMA 9 te hnenah Motor hlan a ni

Formosa Foundation in Reliance Industries Ltd. kaltlanga Mizoram a Sub-Hqrs. YMA hrang hrangte hnena 4x4 Bolero Camper pakua (9) an pek chu niminpiah khan Aizawl-a Central YMA Hall-ah hlan niin Sub-Hqrs. YMA Serchhip pawhin Motor hi a dawng a ni.
Heng Motor hlanna puala hun hman hi Central YMA President R. Lalngheta chuan kaihruaiin Formosa Chairman, Jonathan Lalremruata chuan motor hlan tur lo pianchhuah dan a sawi a, “Reliance hotu Pu Anant Ambani nen December 8, 2025 khan Jamnagar-a an inkawmnaah Mizoram tan enge kan tihsak theih che a tih angin, CYMA hotute chu ram tana tangkai an mamawh a zawh hnuah Ruihhlo Do nana heng 4x4 camper an mamawh hle thu an hrilh angin he thil hi rawn thleng ta a ni,” a ti a, Formosa Foundation hi Covid-19 lai khan Mizoram-ah din anih thu tarlangin, Mizoram tan kawng hrang hranga hma an lak thin thu sawiin, hripui len lai khan ei leh bar a harsa chhungkaw 14192 te tana ration te semin, Ventilator, Oxygen Concentrator , PPE, Mask leh School Bus te mipuite hnenah an lo pek tawh thu te a sawi bawk. Hei bakah hian Reliance Industries hian Formosa Foundation nen tangrualin Mizoram mipui, khawtlang te tibuaitu Ruihhlo Dona kawnga hma latu YMA te nen Mizoram tan hmalakna a kalpui thu a sawi bawk.

Heng motor te hi Ruihhlo Dona atan tangkai taka hman anih theih nan Central YMA hruaitute leh Formosa Foundation hotuten Sub-Hqrs. YMA te hnenah an hlan a, Serchhip bakah Kolasib, Mamit, Saitual, Khawzawl, Champhai, Hnahthial, Lunglei leh Siaha Sub-Hqrs. YMA ten heng Motor te hi an dawng a ni.