Serchhip District-a Ruihhlo ngaite puala Gospel Camping nei turin inbuatsaih mek zel a ni

Nasha Mukht Bharat Abhiyan (NMBA) Serchhip District hmalakna in tun thla ni 9 atang khian Ruihhlo ngaite pualin Serchhip-ah Gospel Camping neih a ni dawn a, he hunah hian zu leh ruihhlo avanga harsatna tawk, mamawh nia inhria apiang luh theih niin hemi atan hian mi tlawmngai ten cheng nuai 13 chuang an thawhkhawm tawh bawk.

Tun thla ni 9 atanga ni 20 chhunga Serchhip District pum huap Ruihhlo Ngaite Pual Camping neih tur chungchangah hian nimin khan Serchhip Bawrhsap Paul L. Khuma chuan Serchhip DC Meeting Hall-ah thuthar thehdarhtute kawmin inbuatsaihna an kalpui dan te a sawi a. Bawrhsap chuan NMBA hnuaiah hian kumtin ruihhlo dona kawnga hmalakna tur sum an dawn thin thu leh kumin ah pawh cheng nuai 7 an dawn thu sawiin, hemi hmanna tur atana rawtna hrang hrang thehluh hun an hawn hnuah rawtna lut angin Gospel Camping hi buatsaih tura ruahman a nih thu a sawi a. Hemi atan hian Serchhip Addl. DC Lalrinzuala kaihhruaina hnuaiah Organising Committee dinin November 10, 2025 khan thutkhawm hmasa ber neiin Serchhip District chhunga khaw tin huap turin Camping nei tur hian hma an lak chhoh tan tak thu a sawi a ni.

Serchhip Addl. DC leh Organising Committee Chairman, Lalrinzuala chuan an hmalak chhoh dan thuthar thehdarhtute hnenah sawifiahin, Organising Committee hnuaiah hian Sub-Committee paruk (6) siam leh a nih thu leh he Camping hi Presbyterian New Serchhip Kohhran Biak In behchhana buatsaih a nih dawn thu a sawi a. Organising Committee-ah hian tlawmngai pawl hrang hrang, Kohhran hrang hrang leh sawrkar Department hrang hrangte an tel thu sawiin, Speaker atan Bethel Ministry atangin Federick Lalrindika an beisei thu a sawi a, a tlem berah mi 400 atanga 450 vel dawngsawng thei tura an inbuatsaih thu leh mamawh an tam dan a zirin hei aia tam zawk pawh dawnsawn theih an inbeisei thu a sawi a, tunkar atang khan Camping neihna tur hmunah hian Sub-Committee peng hrang hrang ten hnatlang an neih chhoh tawh thu a sawi bawk.

Serchhip Addl. DC chuan tun tuma Camping neihna tur hian mi tlawmngai te tan sum leh pai thawhkhawm theih tura ruahman a nih thu pawh sawiin, Budget Rs. 13,59,110/- siamin tun thlengin Rs. 13,35,686/- an hmuh tawh thu a sawi a, heng te hi NMBA atangin cheng nuai khat, Chief Minister hnen atangin Rs. 2,50,000/-; Department 41 te thawh Rs. 2,42,700/-; Kohhran hrang hrang 44 te thawh Rs. 3,11,410/- bakah VC, tlawmngai pawl leh mimal ten an thawh Rs. 4,31,576/- te a nih thu a sawi bawk.

He Camping-ah hian a mamawh a tam thei ang ber an luh theihna turin tunah hian Registration kalpui mek a ni a, khua leh Veng hrang VC leh YMA ten hmalakna kalpuiin VC thenkhat chuan Camping-a lut turte kalna tur an buaipui tur thu te an sawi bawk a, Camping-a lut te hi TB leh HIV chungchanga an dinhmun hrechiang duhte tan a thlawna enfiah sak theih tura ruahman niin Camping a hlawhtlin theihna turin ruahmanna hrang hrang an siam tawh thu a sawi a. February 9, 2026 zan ah Camping hi tanin February 21, 2026 zing-ah an chhuak leh dawn a. He Camping-a lut te hi Camp atanga an chhuah hnuah pawh vil zui an nih theihna turin ruahmanna siam tum a ni bawk.

Serchhip District chhunga ruihhlo avanga harsatna tawk zawng zawng te Camping-a an luh theih nan zau taka hawn a ni a. Drug Addict bakah Zu avanga buai te pawh he Camping-ah hian luh theih niin Serchhip District tan chauha hawn a nih avangin District dang atanga lo kalte tan luh ve a rem dawn lo a ni.

Nimin-a Bawrhsap in thuthar thehdarhtute a kawm zawh hnu hian Organising Committee Chairman Lalrinzuala leh Treasurer Lalnunmawii, DIPRO te hovin thuthar thehdarhtute hian Camping neihna tur hmun hi an tlawh nghal a, inbuatsaihna kalpui a nih dan te an thlirho nghal bawk a ni.