NMBA thukhawm in Camping neih tur an thlirho

Nasha Mukht Bharat Abhiyan (NMBA) Serchhip District chu nimin khan Serchhip DC Meeting Hall-ah thukhawmin Ruihhlo ngai te puala Gospel Camping an buatsaih tura hmalakna kal mek an thlirho.
Serchhip DC Meeting Hall-a NMBA thutkhawm ah hian tun thla ni 9 atanga Ruihhlo ngai te puala New Serchhip Kohhran Biak In-a Gospel Camping an buatsaih tura an hmalakna hrang hrang thlirho niin hmalakna kal mek chu chak taka chhunzawm zel nise an ti a. Camping neih zawh hnuah chawlhkar khat chhung Follow-up programme buatsaih zui a nih theihna turin hmalak nise an ti a, hei bakah hian Camping a lut te chu anmahni Kohhran theuh ten tha taka an lo dawmkan zui zel theihna turin hmalak nise an ti bawk.

He thutkhawm kaihruaitu Bawrhsap Paul L. Khuma chuan Camping neih tur atana mawhphurhna hrang hrang neite hmalakna chu lawmawm a tih thu sawiin, Sawrkar, NGO, VC leh Kohhran te thawhhona that zia a langchhuak leh thin chu lawmawm a tih thu a sawi a. “Tangho in hma kan la a, a hlawhtlinna chu Pathian kutah a awm,” tiin tawngtaina lamah pawh tan la zui zel turin thutkhawma tel te leh mipuite chu a sawm nghal bawk a ni.

NMBA hi Drug free India Campaign niin Sawrkar laipui Ministry of Social Justice and Empowerment hnuaia hmalakna a ni a. He hmalakna in a tum (focus) chu Demand Reduction niin, ruihhlo ti mek ten an sim theihna tur leh a la ti ngai lo tên an tih chhin lohna tura tan lak niin kawng hrang hrangin hmalakna kalpui thin a ni.