Serchhip District-a kangmei venna Hapta hman dan tur rel

Nimin khan Serchhip-ah District Level Committee on Fire Prevention chu thukhawmin kumin-a kangmei venna Hapta, ‘Fire Prevention Week 2026’ hman dan tur chungchang an sawiho.
Serchhip DC Pisapui Hall-a thutkhawm hi Serchhip Bawrhsap Paul L. Khuma chuan kaihruaiin State Level Committee on Fire Prevention, 2026 thukhawmin an lo rel tawh angin Fire Prevention Week chu February ni 9 atanga 13 chhung khian hman leh turin niin Serchhip District-a a hawnna inkhawm chu February ni 11 khian Serchhip DC Pisapui Hall-ah neih ni se tiin Bawrhsap, Paul L. Khuma chu khuallian a ni anga, Serchhip District-a kangmei ven kawnga hma la tha khuate hnenah lawmman siam a ni leh dawn a. A endik turin EF&CC Department lamin Sub Headquarters YMA te an thawhpui ang. Kumin hian kangmei ven kawnga titha khuate inelnaa lawmman dawn tur sumfai tihpun a nih dawn bakah District tina titha lawmman pakhatna dawngtute chu Mizoram pum huap inelnaah an tel chhunzawm dawn a. District hrang hrangte inelna pawh neih chhunzawm tur niin lawmman sumfai inpek thin erawh kumin ah hian a awm dawn lo a ni.

March ni 15 ralhmaa lo hal vek tura State Level Committee-in a lo rel tawh te, meikawng sial tura hriattirna te leh kangmei laka invenhimna tha zawk a awm theih nan mipuite hnena ngenna leh hriattirna chu DC in a tichhuak dawn a. Fire Prevention chungchanga awareness campaign chu awmze nei zawka neih a nih theih nana hmalak dan tur hrang hrang relin, Serchhip District-a YMA chanchinbute chu Fire Prevention Week denchhen hian inelna neih tir tura ruahman niin February thlaa ni 100 inhlawhna chhuah hunah kangmei ven inzirtirna uar takin mipui zingah an kalpui dawn bawk a ni.