Serchhip District-a Hriangtlang khua ah Tui inhlanchhawnna Ni, Jal Arpan Diwas hman a ni

Ministry of Jal Shakti-a Department of Drinking Water & Sanitation-in ram hmun hrang hranga Tui inhlanchhawnna Ni, Jal Arpan Diwas hmang tura a beisei angin Serchhip District-ah pawh nimin khan Hriangtlang khua ah he hun hi hman a ni.
Jal Arpan Diwas hi Hriangtlang Main Reservoir hmunah hmang tanin Jal Bandhan Ceremony hman a ni a, hemi hnu hian Jal Walk neih chhunzawm niin Hriangtlang Community Hall thleng kawngzawh a ni a, Hriangtlang Community Hall-ah hian inkhawm neih zui niin PHE Serchhip WATSAN Division-a Sr. EE, Er. Isaac Lalchhuanmawia chuan khuallian niin a hmanpui a ni. He hunah hian khuallian chuan he hun hman a nihna chhan te sawifiahin, JJM Scheme kaltlanga tuilak te khawtlang kutah hlan a lo nih tawh thu leh Central Sawrkarin Jal Arpan Diwas a rawn ruahman takah chuan he hun hi hmangin Official taka khawtlang kut a hlanna ni a pawm tur a nih thu a sawi a ni.

Khuallian Sawrkar chuan tui hnianghnar zawk kan neihna tur a a tih theih sang tak a ti tawh thu sawiin, heng an tuilakna hnar lo humhalh te leh tui hnianghnar zawk an neih zelna tura Operation & Maintenance hna thawh chu mipuite kut a nih tawh dawn thu a sawi a, neitu an nih inhria a thahnemngaihna rilru an put chhoh a an ngaihpawimawh a tul thu a sawi a. A enkawlna khawnga hma latu ber WATSAN ten ruahmanna a siam te lo zawm a, tui fee pe tha turin mipuite a sawm a, harsatna kan tawk a nih chuan Department te pawn theihtawp an chhuah zel tur thu a sawi bawk.

Nimin-a he hun hman hi District Coordinator, Samuel Lallawmzuala chuan kaihruaiin he tui inhlanchhawna hi Sr. EE, PHE Serchhip WATSAN Division leh Hriangtlang VCP ten hming ziakin an nemnghet a. Hriangtlang VCP Remlalruata chuan JJM Scheme avang leh PHE Department-a thawktu, an hotute zarah Hriangtlang khua in tui an hnianghnar thu sawiin, hemi enkawl kawnga an hmalak dan leh tuihnar an humhalh dan te a sawi a, hun lo kal tur atana ruahmanna an siamte a tarlang bawk.

He hunah hian Upa C. Lallianzuala chuan hunserh hmangin Tui vawng thianghlim tur leh humhalh tura thutiam, Jal Sankalp (Water pledge) chu chhamrualin JE, PC. Lianrengpuii hovin FTK Trained Person (Five Women) ten tui test dan a takin an entire bawk a. Private High School Hriangtlang ten Jal Bandhana (Cultural performance) Cheraw lam entirin Er.Vanlalmuanawma, SDO Serchhip in lawmthu sawiin hun a hmang bawk a ni.