Kum tling lova inneih khapna inzirtirna hawn a ni

Nimin khan Serchhip-ah kum tlinglo-a Inneih khapna chungchang ni 100 chhung inzirtirna tur hawnna leh Prohibition of Child Marriage Act, 2006 chungchang zirhona neih a ni.
Sub-Hqrs. YMA Hall, Serchhip-a ‘100 Days Intensive Awareness Campaign on Child Marriage Free Bharat & Legal Awareness cum Training on the Prohibition of Child Marriage Act, 2006 Under Bal Vivah Mukht Bharat Campaign’ hawnna hi Serchhip ICDS Project-a CDPO Caryll Lalpari chuan kaihruaiin he beiihpui thlakna hawngtu Women & Child Development Department, Ser-chhip-a District Programme Officer, Lalthlamuani Rokhum chuan India ram hmun dangah kum tlinglo inneihna a hluar hle tih sawiin, Mizoram-ah pawh za-a za kan fihlim tawh lo tih a sawi a. Kum tling lo a inneihna hian retheihna, fahrah leh sualna thlengin a tipunlun thei tih sawiin, Kum tling lo a inneihna hi India sawrkar chuan tihrem tumin nasa takin hma a la mek a, nu leh pa leh khawtlang hruaitute pawhin mawhphurhna kan nei tih hre thar a, a tihlawhlinpuitu ni turin kalkhawm te a sawm a. Hemi chungchang inzirtirna ni 100 chhung neih tur chu tluang taka neih a nih theih nan duhsakna a hlan nghal bawk a ni.

He hunah hian District Legal Services Authority, Serchhip District-a Chief Legal Defence Avilla Laltanpuii Renthlei danin kum tlinglo inneihna a khap dan leh hremna dante, Mizo hnam dan leh hemi kaihhnawih thil pawimawh hrang hrangte chu he huna kalkhawmte a zirtir a, Serchhip-a District Child Protection Officer (DCPO) R. Lalramdinmawii chuan POCSO Act leh naupang te himna chungchanga Dan pawimawh hrang hrangte a zirtir bawk a. He hunah hian Serchhip khawpui chhunga Anganwadi Worker, Serchhip Bazar Presbyterian Kohhran Hmeichhe member te, Hmeichhia VC Member te leh MHIP hruaitute telin zawhna leh chhanna hun te hman a ni bawk.