Serchhip District-ah Rulhut hlo pek beihpui thlak a ni

Kumin atana rampum-a Rulhut hlo pek beihpui thlakna hmasa zawk, National Deworming Day (NDD) 2026 February Round chu nimin khan hman leh niin Serchhip-ah pawh kum 1 atanga 19 te hnenah Rulhut hlo pek beihpui thlak a ni.
Serchhip-ah hian National Deworming Day (NDD) 2026 hawnna hi CMO Conference Hall-a neih niin Serchhip Sr. CMO Dr. LP. Malsawma chuan a kaihruai a, District Immunization Officer (DIO), Dr. Lallawmkimi Chhakchhuak chuan Rulhut in kan taksa tana harsatna a siam theih hrang hrangte sawiin, hrisel lohna tam tak a thlen theih avangin Rulhut hlo ei thin a pawimawh thu leh chhungkua ah pawh puitling te nen kan ei fo a tul thu a sawi a. Tuna Rulhut hlo an pek tur chu kum 1 leh kum 19 chin te hnena pek tur a nih thu te, damdawi an pek tur chu dawlh mai lovin thial sawm ngei tur a nih thu leh tuna Rulhut hlo an pek te thildang nena eipawlh inhal a nih loh thu te a sawi bawk.

Nimin-a hun hman ah hian DPM Deborah Vanlalchhuangi chuan kumin a he hmalakna kalpui a nih dan tlangpui tarlangin, Serchhip District-a kum 1 leh 19 inkar mi 22,979 te hnenah Rulhut hlo hi pek tura ruahman a nih thu leh zirna In te bakah Anganwadi Centre hrang hrangte te Rulhut hlo pek beihpui hi thlak tur a nih thu a sawi bawk.

Naupang leh zirlai zawng zawngte Rulhut laka an lo fihlim theih nan National Deworming Day (NDD) hi India ramah kum 2015 khan State/UT 11-ah bultan a ni a, a hlawkna te hmuh a nih hnuin India ram pumah February 2016 atang khan hman chhunzawm a lo ni ta a ni. He hmalakna hi Rulhut pai vanga natna hrang hrang thleng theite, thisen tlakchhamna te leh naupang than thu umbona tura ruahman a ni a, kum 1 – 19 inkarte tan kum tin vawihnih (2) rampum huapin a ruala rulhut-hlo (Albendazole) eitirna hun hi kalpui thin a ni a. Mizoram-ah pawh February 2016-ah khan hman tan niin a ni a. Thla ruk (6) dan ah Rulhut hlo hi ei thin niin August thla ah ei leh tur a ni ang.