Agriculture Department Director leh a thawhpui ten Serchhip Mat Phai an rawn tlawh

Agriculture & Farmers' Welfare Department-a Director Vanlalthlamuana leh Officer pawimawh thenkhat te chuan nimin khan Serchhip District rawn tlawhin kuthnathawktute thlai chinna hmun an tlawh bakah thawktute nen an inkawm nghal bawk.
Serchhip rawn tlawhtute hi Agriculture & Farmers' Welfare Department-a Director Vanlalthlamuana bakah Joint Director C. Malsawmkima leh Deputy Director K. Laltlanmawia te niin nimin zing khan Serchhip rawn thlengin Mat Phai an tlawh nghal a, Serchhip Mat Phai-a Thlasik thlai chinna hmun te an tlawh hnuah Zawlpui Zau FMC hruaitute nen inkawmin sawrkar hmalakna te an sawiho a, Zawlpui Zau FMC hruaitute hian Farm Road chungchanga harsatna an neih te, Serchhip Zawlpui Zau Tuipaih kawr-a Lei dawh an mamawhna te, Lumtui lui tuilakna kaihhnawiha harsatna an neih leh Tuikawng a harsatna an neih te an lo thlen nghal bawk a ni.

Serchhip District Agriculture Officer (DAO) Lalchharliana kaihhruai he inkawmna ah hian Agriculture & Farmers' Welfare Department-a Director Vanlalthlamuana chuan Serchhip chu Buh leh thlai chin kawnga Mizoram hmun pawimawh a nih thu sawiin, helai hmuna buh leh thlai thar te pawh Mizoram mipuite tana chhenfakawm a nih thu te a sawi a. FMC hruaitu ten an mamawh an lo thlen te chu a theih anga a tih hlawhtlin dan ngaihtuah a nih tur thu sawiin, nakin zel atana chhawr zui theih leh tangkai tur ngaihtuah a pawimawh thu a sawi a. Sawrkar hotute nen tangtlanga nasa zawk leh zau zawka hmalak dan turte pawh sawiin, inngheng tlata an tanho a pawimawh thu te pawh a sawi bawk.

Agriculture & Farmers' Welfare Department-a Joint Director C. Malsawmkima pawhin Serchhip chu tunhma lam atanga kuthnathawk nasa, zingkar-ah pawh Motor tam tak hmanga Zawlpui Phai pan thin te awmna a nih thu sawiin, khang mite thawhrimna kha a zar kan zo mek tih a sawi a. Kuthnathawktute tan sawrkar in theihtawp chhuaha hma a lak mek dan te sawiin, sawrkar atanga tanpuina leh chhawmdawlna awm ang ang te dawn tum kher lo tur leh an mamawh te ngei an hmuh theihna tura hma la turin a chah a. Deputy Director, K. Laltlanmawia pawhin Zawlpui Zau FMC ten an mamawh hrang hrang an lo thlen te chu a theih anga a tih hlawhtlin dan an dap tur thu sawiin, sawrkar in nikum lam atangin Buhhum a lei tan thu leh Mizoram hmundang ah te pawh Buhhum hi lei nise Buh thar a pun an beisei thu te a sawi a. Sawrkar in Mat Phai tih hmasawnna atana hma a lakna te a tarlang bawk.

Agriculture Department Director leh a thawhpuite hian Serchhip-a District Agriculture Officer (DAO) Office pawh tlawhin thawktute nen an inkawm a, hemi hnu hian Hmuntha ram a Rubber chinna hmun pawh tlawh nghalin thawktute nen an inkawm nghal bawk a ni.