Sawhthing rate bithliah anga chhangtu an awm lo

Mizoram Agricultural Marketing Board (MAMB) hotute chuan kumin-a Sawhthing hralh chhuah chungchangah Sawhthing lei tura Tender rate an bituk kg-a cheng 40 atanga cheng 45 inkar chu chhangtu an la awm lo tih an sawi.

MAMB hotute sawi danin, Sawhthing chingtuten a an Sawh-thing hralh tur an dahkhawmna Secondary Collection Center (SCC) chu kumin atangin awmze nei taka kalpui a nih thu an sawi a. Nikum lama Sawhthing chingtute’n an Sawhthing chawh hmasak apiang SCC-a an dahkhawm chuan Sawhthing rihna a tihhniam bakah tawih chhia a siam tam theih thu sawiin, hemi pumpelhna atan hian kumin lamah chuan Sawhthing dahkhawm pawh awmze nei zawka an kalpui thu an sawi a. SCC-a Sawhthing dahluh chu a dahna Ip-ah a neitu hming leh khaw hming bakah Ration Card number emaw, Aadhaar Card number ziah tel thlap thin a nih thu an sawi.

MAMB hotute chuan mi thenkhatin Manipur leh Burma atangin Sawhthing chawhsa man tlawm te a lalutin, Mizoram-a chin anga hralhchhawn leh an tum tih sawiin, hetiang thil ti thinte hi an hming leh an khua an hriat vek tawh bakah Champhai Bawrhsap leh Home Department lam pawh hriattir an nih tawh thu an sawi bawk.