Ranvulhtute tan Animal Insurance tlangzarh a ni

Mizorama ranvulhtute tana ‘Animal Insurance’ chu nimin khan AH&Vety Minister C. Lalsawivunga chuan a tlangzarh a, Animal Insurance hian Vawk, Bawng, Sial, Kel leh Beram te a huam dawn a ni.

Planning & Programme Implementation Department Committee Room-a Animal Insurance tlangzarhna hunah hian National Insurance Company Ltd. leh AH&Vety Department Secretary Lalsangliana ten Minister leh MSPCC Vice Chairman Dr. KC. Lalmalsawmzauva hmaah thawhhona thuthlung an ziak a. He Animal Insurance hian ranvulh hrang hrang Vawk, Bawng, Sial, Kel, Berawm a huap dawn a. Implementing Agency atan National Insurance Company Ltd. thlan an ni a. Premium zaa sawmpanga (15%) hi ranvulhtu ten an tum ve tur a ni a, Handholding hnuaia progress partners te erawh chu handholding atanga tumsak vek an nih dawn thung a. Vawk vulh Insurance atan Rs. 2000 chawi tur chu Rs. 292 chauh farmer (Bana Kaih Scheme progress partner ni lo) ten an tum a ngai dawn a ni.

Animal Insurance hawnna hunah hian Agriculture Minister C. Lalsawivunga chuan ranvulhtute mamawh em em ran insurance kalpui tak tak tura hmalakna a awm ta chu lawmawm a tih thu a sawi a. Insurance Company tam zawkin Animal Insurance an tuipui loh thu leh ASF avanga Mizoram-ah Insurance Company kohluh an har thu sawiin, Chief Minister Lalduhoma'n Sawrkar laipuiah thlenin, Insurance Company hrang hrang Head Office ah lehkha a thawn avanga tun dinhmun thleng ta an nih thu a sawi a. Mizoram chu vawksa ah a intodelh dawna a lan mek laiin kum 2021 atanga ASF leng chuan nasa takin Vawkvulhtute a nuai thu leh kha hrilen atang khan ngai an awh leh tawh loh thu te, ASF avanga vawk vulhtute sum hloh hi vbc. 960 (Rs 960 crore) a tlin tawh thu a sawi bawk.

AH&Vety Minister chuan sawrkarin Animal Insurance ah theihtawp a chhuah thu sawi bawkin, Animal Insurance-a State Matching Share 30% pawh 10% a tihhniamsak turin Union Minister ah a ngen thu leh Mizoram ngenna angin 10% ah tihhniamsak a nih thu a sawi a. Tun tuma Insurance tlangzarh tak atan hian Central atangin cheng nuai 66.49 hmuh a nih thu leh hei hi first installment chauh niin, first instalment ah hian ran 4545 Insured tum anih thu a sawi a. Sawrkar chu ranvulhtute hmangaihtu anih thu leh ASF avanga tuar te tawrhpui nan ASF chu State Specific Disaster-ah puan anih tawh thu te, ASF tuarte zangnadawmna compensation pek thin an nih thu te a sawi bawk.

He hunah hian National Insurance Co. Ltd. atangin Animal Insurance hnuaia Insurance dil dan tur tlangpui leh Insurance hmuh theih dan te ngaihthlak a ni a. Insurance claim chu State dang a refer ngai lovin Aizawl-ah chinfel theih a nih tur thu te tarlan a ni bawk.